کێ "خەلیفە"ی کوشت؟

ئەیوب ڕەزا
نوسەر و ڕاگەیاندنكار
ئه‌گه‌ر و سیناریۆكان
سه‌رله‌ئێواره‌ی‌ رۆژی‌ دووشه‌ممه‌، سه‌رۆك ترامپ، ئه‌و ده‌نگۆیه‌ی‌ یه‌كلا كرده‌وه‌، كه‌ گۆڤاری‌ (نیوزویك)ی‌ ئه‌مه‌ریكی‌ له‌مه‌ڕ كوژرانی‌ ئه‌بووبه‌كر به‌غدادی‌ بڵاوی كردبووه‌وه‌، له‌ ئۆپه‌راسیونێكی‌ سه‌ربازیی‌ هێزه‌ تایبه‌ته‌كانی‌ ئه‌مەریكا له‌ شاری ئیدلب له‌ باكووری‌ رۆژئاوای‌ سووریا، ئه‌ویش به‌ پشتڕاستكردنه‌وه‌ی‌ هه‌واڵی‌ كوژرانی به‌غدادی‌. دیاره‌ قسه‌كه‌ی‌ تۆڕی‌ هه‌واڵی‌ (سی‌ ئێن ئێن)ی‌ ئه‌مەریكییش ڕاست ده‌رچوو، به‌وه‌ی‌ كه‌ به‌غدادی‌ به‌ كرده‌وه‌یه‌كی‌ خۆكوژی كوتایی‌ به‌ ژیانی‌ خۆی‌ هینابوو، وه‌لێ ئه‌فسووس دوای ئه‌وه‌ی‌ ئه‌م‌ تاوانكاره‌ بووه‌ هۆی‌ كوژرانی سه‌دان هه‌زار هاووڵاتیی عێراقی و سووریی‌ به‌دبه‌خت.

سه‌رۆك ترامپ، له‌ كاتی‌ کۆنگره‌ رۆژنامه‌وانییه‌كه‌دا، له‌ ترۆپكی‌ سه‌ركه‌وتندا بوو، وه‌ك پاڵه‌وانێكی‌ زۆرانباز خۆی‌ نماییش ده‌كرد، به‌ڵام جیا له‌ جاران، قسه‌ی‌ هه‌له‌ق و مه‌له‌قی‌ نه‌كرد، به‌پێچه‌وانه‌وه‌ هه‌رچه‌ند وتاره‌كه‌ی‌ درێژ بوو، به‌ڵام نهێنی پارێز و دانگر به‌خۆ بوو، له‌باره‌ی‌ ئاشكرانه‌كردنی‌ ته‌واوی‌ ورده‌كارییه‌ نهێنییه‌كانی ئۆپه‌راسیونه‌كه‌. ”ئه‌و نهێنییانه‌ی‌، كه‌ به‌ ئاشكراكردنیان، مه‌ترسیی بۆ سه‌ر گیان و ژیانی ئه‌و تیمه‌ هه‌واڵگرییه‌ ئه‌مەریكییه‌ دروست ئه‌كات، كه‌ شوێنهه‌ڵگری‌ به‌غدادی‌ بوون" به‌ وته‌ی‌ ترامپ.

سوپاسگوزاریی‌ پێشكه‌ش به‌ وڵاتانی (رووسیا و توركیا و سووریا و عێراق) کرد، هه‌روه‌ها باسی‌ ئه‌وه‌ی‌ كرد، كه‌ كورده‌كان (مه‌به‌ستی‌ هێزه‌كانی‌ سووریای‌ دیموكرات)ه‌، كۆمه‌ڵیك زانیاریی‌ به‌سوودیان پێشكه‌ش كردووه‌، به‌ڵام "به‌بێ ئه‌وه‌ی‌ هیچ رۆڵێكی سه‌ربازییان هه‌بووبێ" ئه‌مه‌ به‌ گوته‌ی‌ ترامپ خۆی‌ له‌میانی‌ كۆنگره‌كه‌دا.

ئه‌وه‌ی‌ له‌باره‌ی‌ ئۆپه‌راسێونه‌كه‌وه‌ باس ده‌كرێت ئه‌وه‌یه‌، كه‌ پرۆسه‌كه‌ له‌لایه‌ن 70 سه‌ربازی‌ سه‌ر به‌ دوو یه‌كه‌ی‌ تایبه‌تی‌ ئەمەریکییەوه‌ ئه‌نجام دراوه‌ و پرۆسه‌كه‌ش له‌ 100% ئه‌مەریكی‌ بووه‌. به‌م قسه‌یه‌ش ترامپ هه‌موو ده‌ستكه‌وته‌كه‌ی‌ به‌ مۆری‌ (made in usa) نه‌خشاند و هیچ بوارێكی‌ بۆ هیچ لایه‌ن و وڵاتێك نه‌هێشته‌وه‌، كه‌ خۆی‌ هه‌ڵقورتێنی‌ و خۆی‌ بكاته‌ شه‌ریكه‌به‌ش، كرده‌كه‌ش به‌پێی‌ ئه‌و هه‌واڵانه‌ی‌، كه‌ له‌ سووریاوه‌ باسی لێ ده‌كه‌ن، سه‌ره‌تا به‌ پێكانی‌ كۆمه‌ڵێك یه‌كه‌ی‌ چه‌كداریی‌ جوولا و به‌ ئۆتۆمبیلی‌ دۆشكه‌هه‌ڵگر و چه‌كداری‌ پڕ چه‌ك له‌ ڕێی‌ فڕۆكه‌وه‌ و پاشان به‌ دابه‌زاندنی‌ سه‌رباز له‌ ده‌وری‌ مۆڵگه‌ی‌ به‌غدادی‌ له‌ شاره‌دێی‌ (باریشا)، كه‌ سه‌ر به‌ پارێزگای‌ ئیدلبه‌، كه‌ له‌ژێر كونترۆڵی ده‌سته‌ی‌ ڕزگاریی‌ شامدایه‌ ( به‌ره‌ی‌ نوسڕه‌)ی‌ كۆن، پاشان سه‌ربازه‌ ئەمەریکییەكان توانیویانه‌ له‌و تونێله‌ی‌ خۆی‌ تێدا حه‌شار داوه‌، گه‌مارۆیه‌كی‌ مه‌حكه‌می‌ مۆڵگه‌كه‌ی‌ به‌غدادی بده‌ن. به‌ گوته‌ی‌ سه‌رۆك ترامپ، تونێله‌كه‌ له‌ کۆتاییدا ده‌روازه‌ی‌ تیادا نه‌بووه‌ و به‌غدادییش خۆی به‌ده‌سته‌وه‌ نه‌داوه‌ و خۆی‌ به‌ ته‌قاندنه‌وه‌ی‌ پشتوێنی‌ مینڕێژكراوەوە كوشتووه‌ و له‌و كاته‌شدا ژن و منداڵه‌كانی‌ له‌گه‌ڵدا بوون.

به‌ڵام با بزانین به‌غدادی‌ چۆن توانیویه‌تی‌ له‌ باغۆزه‌وه‌ له‌نزیك رۆژهه‌ڵاته‌وه‌ خۆی‌ بگه‌یه‌نێتە ناوچه‌ گوندنشینه‌كانی‌ ئیدلب له‌ باكووری‌ رۆژئاوا له‌سه‌ر سنووری‌ توركیا، كه‌ له‌نێوانیاندا سه‌دان بازگه‌ و ده‌یان جێگای‌ ژێر ده‌سته‌ڵاتی‌ گرووپی توندی‌ جیاواز جیاواز و دژ به‌یەكی بڕیوه‌، به‌ یه‌په‌گه‌وه‌ تا ده‌گاته‌ رووسیا و رژێمی سووریا و گرووپه‌ تیرۆریسته‌كان و سوپای به‌ناو ئازادی‌ سووریا و ئه‌و گرووپانه‌ی‌ كه‌ سه‌ر به‌ توركیان! ئه‌مه‌ش په‌نهانییه‌كی‌ گه‌وره‌یه‌ و ده‌بێت به‌دواداچوونی بۆ بكرێت، به‌ڵام ده‌بێ ئه‌وه‌ش بزانین، كه‌ پاره‌ كاری‌ سه‌رسوڕهێنه‌ر ده‌كات، پاشان ئایا ڕاسته‌ كه‌ ویستوویه‌تی‌ خۆی‌ بگه‌یه‌نێته‌ توركیا؟ پاشان چۆن توانیویه‌تی‌ ئه‌م چه‌ند وه‌خته‌ له‌ ئیدلب جێگای‌ خۆی‌ بكاته‌وه‌، له‌كاتێكدا كه‌ ئه‌و پارێزگایه‌ له‌ژێر ده‌سه‌ڵاتی‌ ده‌سته‌ی‌ ڕزگاریی‌ شامدایه‌ (به‌ره‌ی‌ نوسڕه‌) به‌ ئیماره‌تی‌ (ئه‌بوو محمه‌د جۆلانی‌)، كه‌ دوژمنی‌ سه‌رسه‌ختی‌ داعش و خه‌لیفه‌كه‌یه‌تی‌؟ له‌ڕاستیدا داعش پێش ئه‌وه‌ی‌ باغۆز دوایین مۆڵگەی‌ سه‌ربازیی‌ داعش هه‌ره‌س بێنێ، سه‌ركردایه‌تیی‌ داعش سه‌رگه‌رمی‌ دۆزینه‌وه‌ی‌ جێپێیه‌كی‌ تر بوون له‌ جێگایه‌ك، كه‌ هیچ كه‌س به‌ خه‌یاڵیدا نه‌یه‌ت له ‌بنده‌ستی‌ به‌ره‌ی‌ نوسڕه‌، ئه‌ویش به‌وه‌ی‌ كه‌ داعش هه‌لی‌ ئینشقاقی هه‌ردوو گرووپی توندڕه‌وی‌ (احرار الشام و صقور الشام) له‌ به‌ره‌ی‌ نوسڕه‌ی قۆسته‌وه‌ و توانی‌ كۆمه‌ڵێ ناوچه‌ی گوندنشینه‌كانی‌ ئیدلب بخاته‌ ژێر ده‌سته‌ڵاتی‌ خۆیه‌وه‌ و ورده‌ ورده‌ش له‌وێوه‌ هاتنی‌ به‌غدادی‌، كه‌ له‌ژێر ناوی (أبو محمد الحلبی) و منداڵ و ژنه‌كانی‌ و كۆمه‌ڵێك هاوه‌ڵی‌ بۆ (باریشا) فه‌راهه‌م بكات، به‌ڵام دیاره‌ خۆقوتاركردن و چوونه‌ ناو خاكی‌ توركیا كارێكی‌ ئه‌سته‌م بووه‌، بۆیه‌ تا كوژرانی‌ نه‌یتوانیوه‌ خۆی و خێزانه‌كه‌ی‌ قوتار بكات.
 
سه‌ردانه‌كه‌ی‌ مایك پنس بۆ توركیا
بێ شك پرۆسه‌كه‌ ئه‌وه‌نده‌ی‌ له‌باره‌وه‌ زانراوه‌ و هه‌رچییه‌كیش له‌باره‌ی‌ پرۆسه‌یه‌كی‌ هه‌واڵگریی‌ له‌م جۆره‌ بگوترێ، دوور له‌ خیتابی‌ فه‌رمیی‌ لایه‌نی‌ ئه‌نجامده‌ر، ڕه‌نگه‌ تووشی سه‌رئێشه‌ و لێپرسینه‌وه‌مان بكات، به‌ڵام من هه‌رچه‌ند سه‌ر دێنم و ده‌بەم، ناتوانم سه‌ردانه‌كه‌ی‌ چه‌ند رۆژ له‌مه‌وبه‌ری‌ (مایك پنس) جێگری‌ سه‌رۆكی‌ ئه‌مەریكا بۆ توركیا و كۆبوونه‌وه‌ی‌ له‌گه‌ڵ سه‌رۆكی‌ توركیا ئه‌ردۆغان، به‌دوور بگرم له‌م كه‌ینوبه‌ینه‌ی‌ كه‌ ڕووی داوه‌.

له‌ڕاستیدا گومانی‌ ئه‌وه‌ ده‌كه‌م، كه‌ پنس، سه‌رۆكی‌ توركیای‌ ئاگادار كردبێته‌وه‌ له‌وه‌ی‌ كه‌ به‌غدادی‌ له‌و زۆنی‌ ئاگربه‌سته‌دا ده‌ژی‌، كه‌ توركیا به‌درێژایی سنووری‌ له‌گه‌ڵ سووریادا ڕای گه‌یاندووه‌ و شه‌ڕی‌ بۆ ده‌كات و‌ ده‌شبێ ئه‌وه‌ بزانین، كه‌ سه‌ره‌ڕای‌ ناكۆكییه‌كان له‌مه‌ڕ پشتیوانیی ئه‌مەریكا بۆ هێزه‌كانی‌ سووریای‌ دیموكرات و هێرشی توركیا بۆ سه‌ر ناوچه‌ كوردییه‌كانی‌ سووریا، هه‌ردوولای ئه‌مەریكا و توركیا له‌ 7ی مانگی‌ ئابی‌ ڕابردوودا ژوورێكی‌ هاوبه‌شی پرۆسه‌ی‌ سه‌ربازییان پێكهێنا، بۆ سه‌رپه‌رشتیكردنی‌ ناوچه‌ی ئارام له‌نێوان توركیا و سووریا، توركیاش بۆ نواندنی‌ ئه‌ستۆپاكیی‌ خۆی‌ له‌باره‌ی‌ داڵده‌نه‌دانی‌ به‌غدادی‌، چی له‌به‌رده‌ستدا بووبێ خستوویه‌تییه‌ خزمه‌تی‌ (پنس). له‌ڕاستیشدا توركیا پشتگیریی‌ ئه‌و گرووپانه‌ ده‌كات، كه‌ وابه‌ستەن به‌ به‌رنامه‌ی‌ ده‌وڵه‌تی‌ توركیاوه‌، وه‌ك سوپای‌ سووریای‌ به‌ ناو ئازاد و (جیش الرحمن و احرار الشرقیه‌)، كه‌ ئه‌مانه‌ش به‌ رووكار دوژمنایه‌تییه‌كی‌ سه‌ختیان له‌گه‌ڵ داعشدا هه‌یه‌، بگره‌ له‌ناوبردنی‌ به‌غدادی‌ پەرشوبڵاوبوونه‌وه‌ی‌ داعش ده‌گه‌یه‌نێ، ئه‌مه‌ش ته‌واو له‌ به‌رژه‌وه‌ندیی‌ ئه‌و گرووپانه‌دایه‌، كه‌ توركیا پشتگیرییان ده‌كات، توركیاش له‌پێناو ئه‌وه‌ی‌ ئه‌مەریكا رۆڵی‌ هێزه‌كانی‌ سووریای‌ دیموكرات فه‌رامۆش بكات، ئه‌م كاره‌ی‌ كردووه‌ و هه‌روه‌ها ئابوورییه‌كه‌شی له‌ هه‌ڕه‌شه‌ی‌ هه‌ره‌سپێهینان له‌ لایه‌ن ترامپه‌وه‌ ڕزگار كردووه‌، نه‌ك ته‌نیا له‌به‌ر خاتری‌ چاوی‌ كاڵی‌ كوردانی‌ ڕۆژئاوا و هەسەدە.
 
سووریای‌ دیموكرات و كوژرانی به‌غدادی‌
هاوكات له‌گه‌ڵ كۆنگره‌كه‌ی‌ ترامپدا، هێزه‌كانی‌ سووریای‌ دیموكرات له‌ پارێزگای‌ حه‌سه‌كه‌، کۆنگره‌یه‌كی‌ رۆژنامه‌وانیی‌ به‌ست و تیایدا قسه‌كه‌ر به‌ ناوی‌ (هەسەدە) ڕای گه‌یاند، كه‌ به‌غدادی‌ له‌ پرۆسه‌یه‌كی‌ سه‌ربازیی‌ هاوبه‌شدا كوژراوه‌ و پرۆسه‌كه‌ش چه‌ند مانگێكه‌ ئیشی بۆ ده‌كرێ و به‌هۆی‌ هێرشه‌كانی‌ توركیاوه‌ مانگێك دواكه‌وتووه‌. من وای تێده‌گه‌م كه‌ (هەسەدە) بیه‌وێت وامان لێ بگه‌یه‌نێت، كه‌ هێشتا ئه‌و له‌ گه‌مه‌ سیاسی و موخابه‌راتییه‌كانی‌ سووریادا رۆڵ ده‌گێڕێت، ده‌نا ترامپ ڕای گه‌یاند، كه‌ هەسەدە هیچ رۆڵێكی‌ سه‌ربازییان نه‌بووه‌ له‌ كوشتنی‌ به‌غدادیدا، هه‌ر چه‌ند رۆژێك له‌مه‌وبه‌ریش ترامپ له‌ توویتێكیدا نووسیبووی‌ كه‌ "پەكەكە له‌ داعش خراپتره‌".

ئه‌مه‌ش له‌ڕاستیدا به‌یانی‌ كوتاییهاتنی‌ رۆڵی (هەسەدە) ده‌كات. ناڵێم ئەمەریکا چیدی‌ هه‌ڵسوكه‌وتیان له‌گه‌ڵدا ناكات، به‌ڵكوو ئەمەریکا بۆ زامنكردنی‌ به‌رژه‌وه‌ندییه‌كانی‌ خۆی‌ وه‌ك هێزێكی‌ (به‌كرێگرته‌) به‌كاریان دێنێت، بۆ پاراستنی‌ زۆنی‌ ئه‌و ناوچانه‌ی‌ نه‌وتیان تێدایه‌، نه‌ك وه‌ك شه‌ریكێكی‌ ستراتیژی‌ له‌ شه‌ڕی‌ داعش و هه‌ر شه‌ڕێكی‌ تردا، ترامپیش ڕاشكاوانه‌ له‌ کۆنگره‌كه‌دا داوای‌ پشكی‌ ئەمەریکای‌ كرد له‌ نه‌وتی‌ سووریا، كه‌واته‌ مه‌سه‌له‌كه‌ ته‌واو به‌رژه‌وه‌ندیی‌ ئابوورییه‌ و هیچ بواری‌ عاتیفه‌ و سۆز له‌ هزری‌ ئیداره‌ی‌ ئه‌مەریكیدا نییه‌!
 
هه‌ڵوێستی‌ رووسیای‌ فیدراڵ
ترامپ، سوپاسگوزارییه‌كی‌ زۆری‌ پێشكه‌ش به‌ رووسیا كرد و گوتی‌: "رووسه‌كان ئاسمانی‌ فڕینی‌ خۆیانیان بو ئێمه‌ واڵا كرد بۆ جێبه‌جی‌كردنی‌ پرۆسه‌كه‌". بەڵام هه‌ر زوو وه‌زاره‌تی‌ ده‌ره‌وەی‌ رووسیا هاته‌ ده‌نگ و به‌یانێكی‌ ده‌ركرد، تیایدا هاتووه‌ كه‌ "ڕووسیا ئاگاداری‌ جێبه‌جێكردنی‌ پرۆسه‌یه‌كی‌ ئه‌مریكیی‌ له‌و جۆره‌ نییە له‌ سووریا ". هه‌روه‌ها له‌ به‌یانه‌كه‌دا هاتووه‌ كه‌: "ئەمەریکا به‌م راگه‌یاندنه‌ به‌ئه‌نقه‌ست ده‌یه‌وێت گرووپه‌ توندڕه‌وه‌كان رقئه‌ستوور بكات به‌رامبه‌ر سه‌ربازه‌كانی‌ ڕووسیا له‌ سووریا". كه‌واته‌ رووسیا به‌و هه‌موو هێز و توانا و سه‌ردارییه‌ی‌ كه‌ هه‌یه‌تی‌، خۆی‌ بێبه‌ری ده‌كات له‌ به‌شداریكردن له‌م ڕووداوه‌ گرنگه‌دا، كه‌چی هێزێكی‌ وه‌ك هەسەدە به‌زۆر خۆی ده‌كات به‌ شه‌ریكه‌به‌شی سه‌ره‌كیی‌، ئه‌مه‌ش به‌ڕای‌ من ناكامڵیی‌ هزری‌ هه‌واڵگریی‌ (هەسەدە)ه،‌ ده‌نا بۆ ڕووسیا به‌شدار نه‌بووه‌، ئه‌سڵه‌ن رووسیا كۆنترۆڵی‌ ئاسمانیی‌ ئیدلبی‌ كردووه‌ و له‌ ناوچه‌كه‌شدا ته‌نگی‌ به‌ ئەمەریکاش هه‌ڵچنیوه‌، به‌ڵام ڕووسه‌كان زیره‌كن و ده‌زانن ئه‌م خوێنه‌ (كوژرانی‌ به‌غدادی‌) ڕووبارێك خوێن به‌دوای‌ خۆیدا دێنێ!

ته‌نانه‌ت ترامپیش ناوی‌ به‌رپرسانی‌ هه‌واڵگری‌ و ئه‌و عه‌قڵانه‌ی‌، كه‌ شوێن پێی به‌غدادییان هه‌ڵگرتووه‌، به‌نهێنی‌ هێشته‌وه‌، هه‌رچه‌نده‌ كه‌ ئه‌و عه‌قڵانه‌ له‌ ئەمەریکا ده‌ژین و پارێزراون، چوون ئه‌وان ده‌زانن مامەڵه‌ له‌گه‌ڵ كێ ده‌كه‌ن، ئه‌وان خه‌لیفه‌ی‌ توندڕه‌وكانیان كوشتووه‌، كه‌ هێشتا هه‌زاران چه‌كدار و خانه‌ی‌ نووستووی‌ هه‌یه‌، به‌ڵام كورده‌کەی هەسەدە، كه‌ هیچی له‌به‌رده‌ستدا نییه‌ و به‌ته‌نیا ماوه‌ته‌وه‌ و ناچار بووه‌ په‌نا بۆ ڕژیمی‌ سووریا به‌رێت، دێت خۆی‌ ده‌كاته‌ بكوژی‌ به‌غدادی‌.
 
ئێران و پرۆسه‌ی‌ كوشتنی‌ به‌غدادی
له‌گه‌ڵ بڵاوبوونه‌وه‌ی‌ ده‌نگۆی‌ كوشتنی به‌غدادی‌، سه‌رچاوه‌ فه‌رمییه‌كانی‌ ئێران ڕایان گه‌یاند، كه‌ ئەمەریکا پێشوه‌خته‌ ئێرانی‌ له‌ ئه‌نجامدانی‌ پرۆسه‌كه‌ ئاگادار كردووه‌ته‌وه‌، ئه‌مه‌ش به‌ وته‌ی‌ (د. دكتۆر ئەحمەد بان) بۆ كه‌ناڵی‌ (الحدث)، ئه‌وه‌ ده‌گه‌یه‌نیت: "كه‌ په‌یوه‌ندیی‌ ئاڵۆزی‌ نێوان ئەمەریکا و ئێران هه‌ندێك بواری‌ لێلادانی (استپنا‌و)ی تێدا ماوه‌". بەڵام ئه‌م ڕاگه‌یاندنه‌ په‌لكێشم ده‌كات بۆ كۆمه‌ڵێ گریمان، له‌وانه‌ ئاگاداریی‌ ئێران له‌ ڕه‌وشی گرووپه‌ توندڕه‌وه‌كانی‌ وه‌ك قاعیده‌ و تاڵیبان. ئێمه‌ له‌ زنجیره‌ وتارێكدا كه‌ له‌ سه‌ره‌تای‌ مانگی‌ سپته‌مبه‌ر له‌ (باس نیوز) به‌ ناوی‌ (داعش... كاروان و گۆڕانكاری‌) بڵاو كرایه‌وه‌، ئاماژەمان بۆ ئه‌وه‌ كردبوو، كه‌ "داعش ڕه‌نگه‌ به‌ناچاری‌ مل بدات بۆ دروستكردنی‌ په‌یوه‌ندی‌ له‌گه‌ڵ هه‌ندێ ده‌وڵه‌تی‌ ئه‌نتی‌ رۆژئاوا، به‌تایبه‌ت ئەمەریکا، له‌پێناو مانه‌وه‌ی‌ و به‌جێهێنانی‌ هێرشی ئه‌لكترۆنیی‌ له‌ دژی‌ رۆژئاوا". ڕه‌نگه‌ به‌ جۆرێك له‌ جۆره‌كان ئه‌م بۆچوونه‌ هاتبێته‌ دی و له‌م سه‌روبه‌نده‌دا ئاماده‌كاریی‌ بۆ ئه‌م كاره‌ كرابێت و ئێران توانیبێتی‌ شوێنپێی‌ به‌غدادی‌ هه‌ڵبگرێت له‌ سووریا، به‌ڵام بۆ كردنه‌ قوربانی‌، نه‌ك بۆ داڵده‌دان، وه‌ك چۆن مه‌لا كرێكاری‌ ته‌سلیم كرد، ئاوهاش له‌ به‌غدادی‌ بكات. ئه‌مه‌ش به‌ڕای‌ ئێمه‌ گریمانەیه‌كی‌ به‌هێزه‌، به‌ تایبه‌ت ئه‌گه‌ر بزانین، كه‌ ئیداره‌ی‌ ئه‌مەریكی‌ ته‌نیا رۆژێك پێش ڕاگه‌یاندنی‌ كوژرانی‌ به‌غدادی‌، ڕای گه‌یاند كه‌ "ئاسانكاری‌ ده‌كرێت به‌رامبه‌ر به‌ هه‌ندێك پێداویستیی‌ مرۆڤانه‌ له‌و ئابلووقه‌ ئابوورییه‌ی‌، كه‌ ئەمەریکا سەپاندوویه‌تی‌ به‌سه‌ر ڕژێمی‌ ئێراندا".
 
براوه‌كان
ڕاسته‌ كوژرانی‌ به‌غدادی‌ له‌ به‌رژه‌وه‌ندیی‌ ته‌واوی‌ كۆمه‌ڵگای‌ مرۆڤایه‌تیدایه‌، به‌ڵام ڕۆشندیده‌كان چاك ده‌زانن، كه‌ كۆتایی قۆناغێك و سه‌رهه‌ڵدانی‌ قۆناغێكی‌ نوێیه‌ له‌ گه‌مه‌یه‌كی‌ موخابه‌راتیی‌ ترسناك، كه‌ جیهان و ناوچه‌كه‌ پیایدا ده‌گوزه‌رێت (به‌داخه‌وه‌ لێره‌دا بواری‌ ئه‌وه‌ نییه‌، كه‌ ورده‌كارییه‌كانی‌ هه‌لومه‌رجی‌ سه‌رهه‌ڵدانی‌ داعش و هاوشێوه‌كانی‌ باس بكه‌ین، ئه‌مه‌ كارێكی‌ زۆری‌ ده‌وێت).

براوه‌ی‌ یه‌كه‌م و بێ ڕكابه‌ر ترامپه‌، كه‌ زیاتر له‌ دوو هه‌فته‌یه‌ له‌ لایه‌ن دۆست و نه‌یاره‌كانییه‌وە سه‌رزه‌نشت و سه‌ره‌ نێزه‌كی‌ لێ توند ده‌كرێت، به‌هۆی‌ بڕیاری‌ كشانه‌وه‌ی‌ هێزه‌كانی‌ ئەمەریکا له‌ سووریا، دوو دانه‌ هه‌فته‌یه‌ گاڵته‌ی‌ پێده‌كرێ، به‌ڵام ئه‌و به‌ ئه‌نجامدانی‌ ئه‌م پرۆسه‌یه‌، سەلماندی كه‌ له‌ ناوچه‌كه‌دا ئەمەریکا ده‌توانێت له‌ هه‌ر سات و وه‌ختێكدا و‌ به‌ كه‌مترین تێچوون كرده‌وه‌ی‌ وا گرنگ دژی‌ نه‌یارانی‌ ئه‌نجام بدات، ئیدی‌ چ پێویستی‌ به‌م هه‌موو سه‌روه‌ت (به‌فیڕۆدانه‌یه‌) له‌ سووریا، ئه‌م كاره‌ش ته‌واو به‌ دڵی‌ هاووڵاتییانی‌ ئەمەریکایه‌، كه‌ باجێكی‌ ماددیی‌ زۆر ده‌ده‌ن، گه‌وره‌ترین هه‌لیشه‌ بۆ گه‌رمكردنه‌وه‌ی‌ بانگه‌شه‌ی‌ هه‌ڵبژاردنی‌ ترامپ بۆ خولێكی‌ نوێی‌ سه‌رۆكایه‌تی‌ له‌به‌رامبه‌ر (جۆ بایدن)ی نه‌یاری‌، كه‌ به‌ربژێری‌ حزبی‌ دیموكراتی‌ ئەمەریکییە. ئا لێره‌وه‌ ده‌بێ سیاسییه‌كانی‌ كورد فێری‌ ئه‌وه‌ بن، كه‌ ده‌ستكه‌وت و به‌رژه‌وه‌ندیی‌ ئابووریی‌ وڵاتان، پێوەر و لۆژیكه‌ له‌ هاوكێشه‌ سیاسییه‌كانی‌ ناوچه‌كه‌دا، نه‌ك ڕاكێشانی‌ سۆز و عاتیفه‌، سۆز و عاتیفه‌ نه‌ سك تێر ده‌كات و نه‌ گیانیش ده‌پارێزێت.

سەرچاوە/ Basnews

PM:07:54:30/10/2019



ئه‌م بابه‌ته 317 جار خوێنراوه‌ته‌وه‌‌

وتارەکانی تری نوسەر