سلێمانی و کۆنگرەی حیزبەکان

د. موئمین زەڵمى
نووسەر
زۆرینەی حیزبە كوردستانییەكان پابەندی مادەكانی پەیڕەوەی ناوخۆی حیزبەكانیان نابن بۆ گرێدانی كۆنگرەكانیان، بەڵام لەسەر هۆشداری كۆمیسۆنی باڵای هەڵبژاردنەكان بەشێكی زۆر لەحیزبەكان پێویستە ئەمساڵ كۆنگرەی خۆیان ساز بكەن، شەقامی كوردی چۆن لەكۆنگرەی حیزبەكان دەڕوانێت؟‌و حیزبەكان دەیانەوێت چی بگوازنەوە بۆ شەقام؟

بە گوێرەی زانیارییە ڕۆژنامەوانییەكان وا پێدەچێت ئەمساڵ ئەو حیزبانەی كەسەركردایەتی‌و كاریگەرییان زیاترە، لەپارێزگای سلێمانییە. كەهەریەك لەیەكێتیی نیشتیمانیی‌و بزووتنەوەی گۆڕان‌و یەكگرتووی ئیسلامی‌و كۆمەڵی ئیسلامیین، كۆنگرەی دواكەوتووی خۆیان ببەستن‌و لەئێستاشەوە گفتوگۆ‌و پرسە جیاوازەكان لەسەر شێوازی كۆنگرەكان‌و گۆڕانكارییە چاوەڕوانكراواكان دەستیان پێكردووە.

یەكێتیی نیشتیمانیی تا ئێستا تەنها سێ كۆنگرەی بەستووە‌و ئەگەرچی دوایین ڕاگەیەنراوی مەكتەبی سیاسی ئەو حیزبە باسلەوە دەكات بەم نزیكانە وادەی بەستنی كۆنگرەی دیاری دەكرێت، ڕەنگە گرنگترین پرسی كۆنگرەی یەكێتیی پرسی یەكلاكردنەوەی شێوازی ئیدارەدانی حیزبەكە بێت، چونكە پاش كۆچی دوایی مام جەلال تاڵەبانی، تا ئێستا ئاڕاستەكانی ناو یەكێتیی نەیانتوانیوە جێگرەوەیەك یان بەلایەنی كەمەوە شێوازێك، بۆ دانانی جێگرەوە دیاری بكەن، ئێستاش باسوخواسەكان هەر گەرمن‌و ڕوون نییە كەئایا كۆدەنگی لەسەردانانی سكرتێری گشتی دروست دەبێت یان سیستەمی هاوسەرۆكی‌و دەستەی بەڕێوەبردن پیادە دەكرێت.

بزووتنەوەی گۆڕان لەپاش كۆچی دوایی نەوشیروان مستەفاوە دەكرێت بوترێت هەمووشتێكی گۆڕاوە ناوەكەی نەبێت، چونكە فۆڕمی سیاسەتكردنی حیزبەكە‌و شێوازی ئیدارەدان‌و فیكر‌و تەنانەت ئایدۆلۆجیاكەشی كەوتونەتە بەر ڕەخنەی توندی بەشێكی زۆری ئەو ئەكادیمی‌و ڕۆشنبیر‌و گەنجانەی ڕۆژانێك پایەی گۆڕان بوون، بۆیە لەدوای دوو شكستی یەكلەدوایەك لەهەڵبژردنەكاندا، چاوەڕوانی زۆر لەو هێزە‌و گۆڕانكارییەكانی ناكرێت، چونكە نزیكەی نیوەی ئەندامانی خانەی ڕاپەڕاندن بڕیاریانداوە خۆیان كاندید ناكەنەوە، بەڵام دیسان ئەمە بەشێكی لەبەرپرسیارییەتی ڕاكردنە یان فۆڕمێكیتری ناڕازیبوونە  بە سیاسەتی ئێستای حیزبەكە.

هەرچی یەكگرتووی ئیسلامی‌و كۆمەڵی ئیسلامیشن ئامادەكارییە سەرەتاییەكانیان بۆ گرێدانی كۆنگرە دەستپێكردووە‌و گرنگیپێدەرانی سیاسەت چاویان لەسەر دوو بانگەشەی ئەم هێزە ئیسلامییە، كەئەوانیش توخكردنەوەی پەروەردەكەی یەكگرتوو‌ و كرانەوەی زیاتر‌و ناوگۆڕینەكەی كۆمەڵن.

یەكگرتووی ئیسلامی كوردستان بڕیاری تۆخكردنەوەی كاری بانگخوازی‌و چالاكییە پەروەردەییەكانی داوە‌و لەژێر چاودێری وردی ئەمینداری گشتی حیزبەكەدا لەئێستادا زۆرینەی چالاكییە ئۆرگانییەكانی یەكگرتوو خولی پەروەردەیی‌و كۆرسی بانگخوازین‌،  وا دەردەكەوێت كەتەنها كەناڵی سپێدە‌و فراكسیۆنە پەرلەمانییەكەیان خەریكی سیاسەت بن‌و حیزبەكە خەریكە دەچێتەوە سەر فۆڕمە سەرەتاییەكەی دەیەی نەوەدەكان، بەڵام هێشتا ڕوون نییە ئایا كۆنگرەی حیزبەكە ئەم پێشنیارە پێشوەخت چالاككراوە تەبەنی دەكات یان نا‌؟ ئایا سیاسەتوانانی یەكگرتوو چۆن هەنگاوی داهاتوویان هەڵدەگرن؟

كۆمەڵی ئیسلامی كوردستان لەدوا كۆبوونەوەی ئەنجومەنی سیاسیدا لیژنەی باڵای كۆنگرەی پێكهێنا‌، وا بڕیارە لەهەفتەی داهاتوودا ئەنجومەنی سەركردایەتی حیزبەكە وادەی كۆنگرە دیاری بكات، ئەگەرچی ئەمیری كۆمەڵی ئیسلامی لەپەیامی ساڵوەگەڕی ڕاگەیاندنی حیزبەكەدا باسی لەهەڵگرتنی هەموو سنورەكانی گۆڕانكاری كرد تا دەگاتە لێكردنەوەی پاشگری ئیسلامی لەناوی حیزبەكە، بەڵام چاوەكان زیاتر لەسەر هەوڵەكانی كۆمەڵن بۆ گەڕاندنەوەی سەركردە‌و كادیرە دەستلەكاركێشاوەكانی حیزبەكە‌و سەركردایەتی حیزبەكەش بڕیاری پێكهێنانی لیژنەیەكی داوە، چونكە لەگەڵ ئەوەی كەهەڵبژاردنی ڕابردوو كۆمەڵ كورسییەكی زیاد كرد، بەڵام دەستلەكاركێشانەوەی ژمارەیەكی زۆر لەئەندامەكانی‌و كەنارگیری ژمارەیەكی بەرچاویتر لەسەركردەكانی، حیزبەكەی ڕاگرتووە‌و هەموو هیواكان لەسەر كۆنگرەی چوار هەڵچنراون.

ئەوەی شەقامی كوردی بە تایبەت سلێمانی دەیخوازێت خزمەتكردنی پارێزگاكەیە‌و بە دڵنیاییەوە سەركەوتنی كۆنگرەی حیزبەكان كاریگەری لەسەر ئیدارەدانی پارێزگاكە هەیە، بۆیە خواستی گشتی، خواستێكی ئاشتیخوازانە بەربڵاوە بۆ سەركەوتنی كۆنگرەكان.

ئەم وتارە گوزارشتە لە ڕاى نووسەر و چاوى کورد لێی بەرپرسیار نییە.




PM:03:36:08/09/2019



ئه‌م بابه‌ته 94 جار خوێنراوه‌ته‌وه‌‌

وتارەکانی تری نوسەر