حکومەت نەبێت،بەچی ئەهوەن ببینەوە

مەرزەبان کوردستانى
نووسەر
هەمیشە ئەوەم لاسەرنج بووە، داخۆ میللەتی ئێمە لە چ بۆشاییەكی گەورەدان، وا هەموو شتێکیان لێبوەتە حکومەت و هەر خەریکی حکومەتن.

منداڵ تا گەورە هەموو پەیامێکیان، یان ڕەخنە گرتنە، یان بەشان و باڵ هەڵدانی حکومەتە و هیچیتر. بۆم سەرنج بوو چەند بێ ناوەڕۆک بوە تاکی ئێمە کاتێک مرۆڤەکانی ناو کۆمەڵگەیەک بێ بەرهەم دەبن، پوچی دەیانگرێتەوەو عەقڵیان ستۆک دەکات لەبیرکردنەوەو هەر کارێک، ئیتر ئاسانترین ڕێگە بۆخۆ بەتاڵ کردنەوە، شتێکە کە پێی بوێریت، وە لەئەسنای ئەم وێرانەدا، ئیتر بتەوێت بڵێی کە من هەم، ئەوەش حکومەتە!.

ئەمڕۆش کۆمەڵگەی کوردی لەم قۆنەغەدایە، یەعنی لەهیچ بوارێک ئەزمونی نیە، باشترە بڵێین نەیتوانیوە هەوڵبدات، لەو بوارەی حەزێکی هەبوە بۆی، چەند ساڵێک ئەزمون وەرگرێت، لەهەمانکاتیشدا زات ناکات بەرامبەر هەر زانست و مەعریفە و هونەر و ئەدەبێک، زار بجوڵێنێت. چونکە دەزانێت کە هیچی لێ نازانێت! یاخود بڵێین ئەم باسانە ئیشی عەقڵن و کۆمەڵگەی ئێمەش هەمیشەلەشتی نادیار ترساوە، ئاخر عەقڵ غایبە، بۆیە ئەم هەموو بۆشاییە بە حکومەت پڕدەکاتەوە و خۆی خاڵی دەکاتەوە ، چونکە ڕەخنەگرتن لەحکومەت لەهەموو ئەوبوارانەی باسمکرد خۆشدەسترە، هەموو کەس دەتوانێت پێیدا بڕشێتەوەو ئەمەش ئاسانە بۆ کۆمەڵگەیەکی ناعەقڵانی، وە کۆیلەبونیش بەهەمان شێوە بەکۆمەڵ بونی کۆمەڵگە بۆ سیاسەت، بەجۆرێک موناقەشاتی کاروباری حکومڕانی لەناو کۆمەڵ دەهێنێتە ئاستێکی نزم، کە ببێتە گفتوگۆی عەوام، ڕەوایەتی بەم گەوجاندنەی خۆیان دەدەن چونکە هەموان لەفەزاکەدان، خۆشیان لێ ببێتە شرۆڤەکاری سیاسەتە نێودەوڵەتیەکان!.

هۆکار زۆرن بۆ هاتنە ئارای ئەم دۆخەی ئێستە، بەڵام هۆکارێک کەبۆمن جێی سەرنجە ئەوەیە، لەکۆمەڵگەیەکدا تەنها پارە پەیداکردن بەئیش بزانرێت، دەبێت چاوەڕێی ئەوەش بین، کە ئێستەی کۆمەڵگەو نەوەی داهاتوش، هیچ پەیامێکی جوان و هیچ تاکێکی بەرهەمدار لەهەر بوارێکدا بەرهەم نایەنێت، واتە نابینەخاوەن تاکێکی هۆشیار، بۆیە لە ئێستادا ئایندەی کۆمەڵگەی ئێمە، کە بەدرێژایی ۲۷۲۰ ساڵ لەئەگەری لەناوچون ڕزگار بووین، ئەوە ئێستە زۆر نزیکین لە لەناوچون.

 سەیری گەلانی دنیا بکەین، چ لە ڕەفاهیەتدا یان لە چەوساندنەوەدا، مرۆڤەکانیان دەسبەرداری ئیشی خۆیان نەبوون، جا ئەم ئیشە مۆزیك بێت، یان ئەدەب، یان ماتماتیک، یان هەر بوارێکی مەعریفی، چونکە بەئیشی زانیوە و تیایدا عەقڵی بەگەڕ خستوە.

ئاخر مرۆڤی هۆشیار چێژ لەجوڵاندن و ماندوکردنی عەقڵی وەردەگرێ، دەیەوێ بەشاکار یان هۆشمەندی، بونی خۆی بسەلمێنێت، بۆیە ئەمەش واتای بەژیانیان بەخشیوە و بەهای بەهەموو بوارەکانیش داوەو هەریەکەیان قورسایی خۆیان وەرگرتوە.

لەوڵاتانی دیکە سیاسەت و نوسین ئیشی هەموو کەس نین، هەموو بوارەکانی دیکەش بەئەندازەی سیاسەت و نوسین بەهایان هەیە. ئیش لای ئەوان تەنها بریتی نیە لەپارە پەیداکردن، ئیش خزمەتە بەنەتەوەکەت و مرۆڤایەتی. بۆیە هەرکەس بەجۆرێك پەیامی هەیە، هەیەبە نۆتەیەکی موزیك ئەوکارەی کردوە، یان کەسێک بەئەدەبەکەی، یان شانۆکارێک بە شانۆکەی، یان فەیلەسوفەکانیان بەفەلسەفە، نوسەرەکانیان بەنوسین.

لەڕێگەی ئەمەشەوە گەرەنتی مانەوەی هەزاران ساڵی بۆ نەوەیەکی هۆشیار و نەتەوەکەی مسۆگەر کردووە. وەک لای خۆمان نیە، ئاخر چونکە مرۆڤەکانمان بەهای ئەو عەقڵە زێڕینەی خۆیان لەدەست داوە، بۆیە تەنها ئیشێک بەئیش دەزانن کە پارە پەیدابکات وە تەنهاشتێکیش بەهای هەبیت مادەیە!. بۆیە ئایندە هەڕەشە لەلەناوچونمان دەکات، چونکە شتێکمان نامێنێت بەناوی فەرهەنگ و ئەدەب وهونەر.

هەموو ئەوانی دی، وەک لای خۆمان نیە، کابرا دێڕێکی نەخوێندۆتەوەو لەپاسەکەی دائەبەزێت و تەحلیلی داگیرکردنی عەفرینت بۆدەکات!. بەتەمەنی لاپەڕەیەکی لەسەر ئابوری نەخوێندۆتەوە و نازانێت شەڕی مانەوە لەجیهانی سەرمایەداریدا چیە، دێت نەخشەکێشی بۆئابوری حکومەت دەکات، بەتەمەنی هەرخەریکی پارەو خواردن بوە، نەتەوەی پێ قەشمەرە، مەلایەو دژی حکومەت، جەنگی سارد لەگەڵ کۆرۆنادا هەڵدەگیرسێنێ.

تاکێکی کوردەو هەموو شتێکی خۆی پێ ناشرین و موعجیبی عێراقی نغۆروبوو لەتیرۆر وگەندەڵیە، بۆ؟ چونکە جگە جەستەیەکی مادی هیچی تر نیە.

 لەکۆتیاییدا هەموو ئەمانەی ڕودەدەن ، لەئەنجامی فاسد بوونی عەقڵ و بێتوانایی مرۆڤی ئێمەدایە، بۆ ئەمجۆرە لەمرۆڤیش حکومەت تاکە شتێکە بۆخاڵی بونەوەی و خۆ بەنوسەرکردن بەرامبەری، بۆیە ئەمە نەخۆشیە نەک زۆربونی خوێنەر، نوسین و سیاسەت پێویستی بەمرۆڤی بەئەزمونە.

ئەم وتارە دید و بۆچونی تایبەتی نووسەرەکەیەتی

PM:09:16:29/03/2020



ئه‌م بابه‌ته 886 جار خوێنراوه‌ته‌وه‌‌