نهێنییەکی تری نێو فڕۆکە ئۆکرانییەکە

AM:01:17:26/01/2020
دۆسیە: نێودەوڵەتی


یه‌كه‌ی وه‌رگێڕان
ماڵپەڕی چاوی کورد

بەپێی راپۆرتە رۆژنامەوانییەكان، یەكێك لە قوربانیانی فرۆكە ئۆكرانییەكەی لە ئێران كەوتەخوارەوە، ژنە خاوەنكارێكی ئۆكرانییە‌و بەڕێوەبەری دوو كۆمپانیایە كە رێكخراوی نەتەوە یەكگرتووەكان گومانی لە كۆمپانیاكانی هەیە كە بازرگانی چەك بۆ گەرمكردنی شەڕی لیبیا بكات.

ئۆلینا مالاخۆڤا ئەو ژنە تەمەن (38) ساڵەیە كە بەڕێوەبەری هەردوو كۆمپانیای (SkyAviaTrans) كە بارەگای سەرەكی لە ئۆكرانیا‌و كۆمپانیای (Volaris Business)بارەگاكەی لە ئوسكتلەندایە‌، هەردوو کۆمپانیاکە تایبەتن بە پۆستە‌و گەیاندنی ئاسمانی. ئەم دوو كۆمپانیایە خاوەنی یەك فرۆكەی هاوبەش بوون كە مانگی ئابی ساڵی رابردوو لە لیبیا بەدەستی هێزەكانی (خەلیفە حەفتەر) لەكاتی نیشتنەوەیدا لە فرۆكەخانەی لیبیا تێكشكێنرا، لەو كاتەشدا كۆمپانیای (SkyAviaTrans) رایگەیاند كە فڕۆكەكەیان هاوكاری مرۆیی هەڵگرتبوو، بەڵام هێزەكانی حەفتەر رایانگەیاند كە فرۆكەكە چەك‌و تەقەمەنی سەربازی پێبووە، لێكۆڵینەوە نێودەوڵەتییەكانیش گومانی ئەوەیان هەبوو كە ئەو فرۆكەیە كەلوپەلی سەربازی هەڵگرتووە وەكو باڵی فرۆكەی بێ‌ فرۆكەوان. 

دیار نییە كە مالاخۆڤا كاری چی بووە لە تاران، لەو بارەیەوە وتەبێژی كۆمپانیای (SkyAviaTrans) رایگەیاند: كۆمپانیاكەمان هیچ جۆرە كارێكی لە ئێران نییە‌و ئاگاداری ئەوەش نەبوین كە بەڕێوەبەرەكەمان لەو كاتەدا لە ئێران بوو بێت. 
وتیشی: "مالاخۆڤا لەم چەند مانگەی دواییدا هەموو سەرنجی لەسەر ئەوە بوو كە پارە بۆ قەرەبووكردنەوەی فرۆكەكەی – کە لە لیبیا تێكشكێنرا- كۆبكاتەوە". 
بەپێی تۆماری گەشتە ئاسمانییەكان كە تۆڕی هەواڵی (سی ئێن ئێن)ی ئەمریكی لە پێگەی كۆمپانیاكانی فرۆكەوانی (flightradar24) دەستی كەوتووە، ئەو فرۆكەیە پێش ئەوەی تێكبشكێنرێت، زیاتر لە (30) گەشتی لەنێوان ئۆكرانیا‌و توركیا‌و لیبیادا لەماوەی مانگی ئایار بۆ مانگی ئابی 2019دا كردووە. پێشتریش لە مانگی نۆڤەمبەر‌و دیسەمبەری 2018دا (13) گەشتی لەنێوان ئیمارات‌و یەمەن‌و (6) گەشتی بۆ ئەفغانستان كردووە.

و/ کاوان بەکر


ئه‌م بابه‌ته 60 جار خوێنراوه‌ته‌وه‌‌

بابەتەکانی تری نوسەر