کوژرانی بەغدادی لە سێبەری ئەنقەرەدا

PM:08:08:12/11/2019
دۆسیە: شیکار


تۆرگۆت ئۆغڵۆ
شرۆڤەکاری سیاسیی تورک

لای هه‌موو ئه‌وانه‌ی چاودێریی كاروباری سیاسیی ده‌كه‌ن، زانراوه‌ كه‌ وڵاتان هه‌واڵگرییه‌كانیان به‌ته‌نها له‌ دامه‌زراوه‌یه‌كدا قه‌تیس ناكه‌ن، به‌ڵكو زۆركات لانیكه‌م سێ دامه‌زراوه‌ی هه‌واڵگرییان هه‌یه‌، له‌وانه‌ش هه‌واڵگریی سه‌ربازیی، هه‌واڵگریی تایبه‌ت به‌ پۆلیس و یه‌كێكیشیان پێده‌وترێت هه‌واڵگریی گشتیی یان ئاسایشی نیشتمانیی یان ناوێكی له‌و شێوه‌یه‌.

دامه‌زراوه‌ هه‌واڵگرییه‌كانی تریش له‌ژێر سه‌رپه‌رشتیی یه‌كێك له‌و دامه‌زراوانه‌دان، هه‌مووشیان له‌ژێر چه‌تری دامه‌زراوه‌یه‌كی گشتیدان كه‌ كاری هه‌ماهه‌نگیكردنه‌، له‌ توركیاش شته‌كه‌ وابوو، به‌شێوه‌یه‌ك نمونه‌ی ئه‌م دامه‌زراوانه‌ له‌ژێر سه‌رپه‌رشتی ڕه‌سمیی دامه‌زاروه‌یدا بوون له‌ چوارچێوه‌ی په‌یكه‌ری ده‌وڵه‌تدا.

ڕاسته‌ ناوبه‌ناو گرووپێك كاری نایاسایی ده‌كات، به‌ڵام هه‌رگیز ڕووی نه‌داوه‌ كه‌ سیاسییه‌ك یان ده‌وڵه‌تمه‌دارێك به‌ئاشكرا سه‌رپه‌رشتیی ئه‌و گرووپانه‌ بكات، به‌ڵكو به‌پێچه‌وانه‌وه‌ خۆی بێبه‌ری ده‌كات له‌و گرووپانه‌ و له‌و هه‌ڵانه‌ی ئه‌نجامیان داوه‌، سه‌باره‌ت به‌ دۆخی ئێستا، ئه‌وا دۆخه‌كه‌ ته‌واو جیاوازه‌، ئه‌وه‌ی هه‌موان ده‌یزانن له‌(15)ی ته‌مموزی(2016)دا شانۆگه‌رییه‌كی به‌كۆمه‌ڵ له‌ توركیا نمایشكرا به‌ ناوی (كۆده‌تا).

له‌و شه‌وه‌ ئه‌نگوسته‌چاوه‌دا هه‌موان تووشی شۆك بوون كه‌ هه‌ندێك كه‌سی (مه‌ده‌نی) چه‌كیان به‌ده‌ست بوو كه‌ ده‌بوو ئه‌و چه‌كانه‌ ته‌نها له‌ده‌ستی هێزه‌كانی سوپادا بوونایه‌، ئه‌و كه‌سانه‌ ئه‌و چه‌كانه‌یان له‌دژی سه‌رباز و خه‌ڵكی مه‌ده‌نی به‌كارهێنا.
له‌و شه‌وه‌دا خوێندكارانی خوێندنگه‌ سه‌ربازییه‌كان هێنران، ئه‌وانیش نه‌یانده‌زانی له‌وێ چییان پێده‌وترێت؟ ئه‌وه‌نده‌ی نه‌برد ئه‌و چه‌كدارانه‌ دایان به‌سه‌ریاندا و له‌وێدا به‌ چه‌قۆ سه‌ریان بڕین!

به‌ڵی ده‌گه‌ڕێمه‌وه‌و ده‌ڵێم نزیكه‌ی 250 سه‌ربازیان به‌شێوه‌یه‌كی دڕندانه‌ سه‌ربڕی، زۆربه‌ی قوربانییه‌كانیش خوێندكارانی ئاماده‌ییه‌ سه‌ربازییه‌كان بوون كه‌ ته‌مه‌نیان له‌نێوان 16 بۆ17 ساڵدا بوو، ئه‌و چه‌كانه‌ی پێشیان بوو به‌تاڵ بوو و گولله‌ی تێدا نه‌بوو، ئێمه‌ش ده‌زانین كه‌ گه‌لی توركیا ڕووی چه‌كی ناكاته‌ سه‌ربازه‌كانی، چ جای ئه‌وه‌ی به‌ چه‌قۆ و به‌شێوه‌یه‌كی دڕندانه‌ سه‌ریان ببڕن.

هه‌موو به‌ڵگه‌كان ئاماژه‌ بۆ ئه‌وه‌ ده‌كه‌ن كه‌ هه‌زاران بكوژ كه‌ پێشتر زۆر به‌وردیی ڕێكخرابوون، ئه‌و شه‌وه‌ دزه‌یان پێكرابووه‌ ناو جه‌ماوه‌ره‌وه‌ و ئه‌و تاوانه‌ قێزه‌ونه‌یان به‌ خوێنێكی سارده‌وه‌ ئه‌نجامدابوو.

كه‌واته‌ ئه‌و ژماره‌ زۆره‌ چه‌ته‌یه‌ له‌ كوێوه‌ هاتن و به‌ره‌و كوێ كتوپڕ له‌چاو ون بوون؟
ئه‌وه‌ی ئه‌و چه‌كانه‌ی دابه‌شكرد به‌سه‌ر ئه‌و چه‌تانه‌دا كۆمپانیایه‌كی ئه‌منییه‌ به‌ ناوی (SADAT) كه‌ كۆمپانیای نێوده‌وڵه‌تی بۆ ڕاوێژكاریی به‌رگریی. هه‌ر ئه‌و كۆمپانیایه‌شه‌ كه‌ چه‌كی دابه‌شكردووه‌ به‌سه‌ر ئه‌و چه‌كدارانه‌ی كه‌ له‌ڕێگه‌ی هه‌ندێك ڕێكخراوه‌وه‌ كه‌ هه‌موویان ناوی ڕێكخراوی خێرخوازییان له‌ خۆیان ناوه‌، هاتنه‌ توركیاوه‌ و دواتریش مه‌شقی سه‌ربازییان بینی و پاشانیش په‌یوه‌ندییان كرد به‌ ڕێكخراوه‌ تیرۆریستیه‌كانی وه‌ك داعشه‌وه‌.

هێشتا چه‌ندین چه‌كداری داعشی چالاك هه‌ن له‌ ڕیزه‌كانی ئه‌وه‌ی پێده‌وترێت (سوپای سوریای ئازاد)و بۆ یه‌كه‌مجاریش له‌ ڕێگه‌ی ئه‌و كۆمپانیایه‌ی باسمان كرد، مه‌شقی سه‌ربازییان پێكراوه‌و پێشتر له‌ هیچ دامه‌زراوه‌یه‌كی تر جگه‌ له‌و دامه‌زراوه‌یه‌، مه‌شقیان نه‌كردووه‌.

هه‌روه‌ها هه‌ر ئه‌و كۆمپانیایه‌ هاوئاهه‌نگیی ده‌كات له‌نێوان چه‌كدارانی داعش و سوپای ئازادی سوریاو هه‌موو ڕێكخراوه‌ تیرۆریستییه‌ توندڕه‌وه‌ چالاكه‌كانی ناوچه‌كه‌دا. ئه‌و میكانیزمه‌ی ئه‌و كۆمپانیایه‌ به‌كارده‌هێنێت ئه‌و رێكخراوه‌، كه‌ له‌ژێر ناوی ڕێكخراوی خێرخوازیدا كارده‌كه‌ن.

ئه‌وه‌ی ده‌یه‌وێت دڵنیابێت له‌ ڕاستی قسه‌كانمان له‌م باره‌یه‌وه‌، با بگه‌ڕێته‌وه‌ بۆ دۆسییه‌كانی دادگای په‌یوه‌ست به‌و بارهه‌ڵگرانه‌ی هیی هه‌واڵگریی توركیا بوون و چه‌كی بۆ سووریا ده‌گواسته‌وه‌و له‌ ساڵی 2014دا ده‌ستی به‌سه‌رداگیرا، جگه‌ له‌وه‌ش تۆماره‌كانی پارله‌مانی توركیایه‌ كه‌ په‌یوه‌ندی به‌م بابه‌ته‌وه‌ هه‌یه‌.

نوێنه‌ری پێشووی پارله‌مان سه‌ر به‌ حیزبی گه‌لی كۆماریی (ئیره‌ ئیردم) له‌سه‌ر سه‌كۆی پارله‌مان ئه‌م مه‌سه‌له‌یه‌ی باسكردو كه‌ناڵی پارله‌مانیش ڕاسته‌خۆ قسه‌كانی گواسته‌وه‌و هێشتا ڤیدیۆكانی ئه‌و دانیشتنه‌ و لێدوانه‌كانی ئه‌و پارله‌مانتاره‌ له‌سه‌ر چه‌ناڵی یوتیوب هه‌ن. ئه‌و پارله‌مانتاره‌ ده‌یویست تیشك بخرێته‌ سه‌ر كار و چالاكییه‌كانی ئه‌و كۆمپانیایه‌، واته‌ (SADAT)و ڕێوشوێنی پێویست له‌دژی بیگیرێته‌به‌ر.

له‌ هه‌نگاوی یه‌كه‌مدا ڕێوشوێنی پێویست له‌دژی ئه‌و پارله‌مانتاره‌ گیرایه‌به‌ر نه‌ك كۆمپانیاكه‌ ، ئه‌وه‌بوو پارێزبه‌ندیی لێ سه‌ندرایه‌وه‌، دواتریش ده‌ستگیركراو ماوه‌ی (489) ڕۆژ خرایه‌ زیندانه‌وه‌ به‌پاساوی بێبنه‌ما (له‌كاتی نوسینی ئه‌م وتاره‌مدا، مژده‌یان دامێ كه‌ ئه‌و پارله‌مانتاره‌ دوای(16)  مانگ ئازادكراوه‌).

سه‌باره‌ت به‌ كۆمپانیاكه‌ش كه‌ ده‌بوو چاوی بخرێته‌ سه‌ر، پێچه‌وانه‌ی ئه‌وه‌ی ئه‌و پارله‌مانتاره‌ به‌سته‌زمانه‌ ده‌یویست، له‌ ئابی (2016) دا ڕه‌جه‌ب ته‌یب ئه‌ردۆگان دامه‌زرێنه‌ری ئه‌و كۆمپانیایه‌ كه‌ ناوی (عه‌دنان تانریفیردی)یه‌ كرده‌ گه‌وره‌ ڕاوێژكاری كۆشكی سه‌رۆكایه‌تی و تائێستاش ئه‌و پیاوه‌ جگه‌ له‌وه‌ی به‌رده‌وامه‌ له‌ پۆسته‌ حكومییه‌كه‌ی، له‌پاڵیشیدا كۆمپانیای (SADAT) به‌ڕێوه‌ده‌بات.

ده‌بێت ئه‌وه‌ له‌بیر نه‌كه‌ین كه‌ (عه‌دنان تانریفیردی) یه‌كێكه‌ له‌ سه‌ركرده‌كانی ئیسلامی سیاسی كه‌ پشتیوانی تیكه‌ڵبوونی سیستمی توركیا ده‌كات به‌و سیستمه‌ی له‌ ئێران هه‌یه‌.
ڕه‌نگه‌ خوێنه‌ری به‌ڕێز بپرسێت ئه‌م پێشه‌كییه‌ درێژه‌ چ په‌یوه‌ندییه‌كی به‌ وتاره‌كه‌وه‌ هه‌یه‌؟

به‌ڵێ، ده‌مه‌وێت ئه‌م زانیارییانه‌ی له‌سه‌ره‌وه‌ باسكران بخه‌مه‌ پێش چاوی خوێنه‌ری به‌ڕێز، بۆ ئه‌وه‌ی له‌به‌ر ڕۆشنایی ئه‌وه‌دا له‌ چه‌ند گۆشه‌یه‌كی جیاوازه‌وه‌ شیكردنه‌وه‌ بۆ ئه‌و پرۆسه‌یه‌ بكه‌م كه‌ له‌دژی سه‌ركرده‌ی ڕێكخراوی داعشی تیرۆریستی به‌ڕێوه‌چوو.
ئه‌بوبه‌كر به‌غدادی تیرۆریست به‌ر له‌ چه‌ند هه‌فته‌یه‌ك، له‌ ئه‌نجامی پرۆسه‌یه‌كدا كوژرا كه‌ ویلایه‌ته‌ یه‌كگرتووه‌كانی ئه‌مریكا له‌ ناوچه‌یه‌كی ژێرده‌سه‌ڵاتی ئۆردۆگاندا ئه‌نجامیدا! هه‌موانیش ده‌زانن به‌غدادی ماوه‌ی سێ مانگ بوو له‌ خانوویه‌كدا ده‌ژیا كه‌ ته‌نها پێنج كیلۆمه‌تر له‌ سنووری توركیاوه‌ دوور بوو!

ئه‌وه‌ی جێگه‌ی گرنگیپێدانه‌ ئه‌وه‌یه‌ كه‌ كه‌س نه‌یتوانیوه‌ بگاته‌ ئه‌و شوێنه‌ ئه‌گه‌ر به‌ (10) خاڵی پشكنینی سه‌ربه‌ هێزه‌كانی توركیادا تێپه‌ڕ نه‌بووبێت، ئه‌مه‌ش مانای ئه‌وه‌یه‌ ئه‌و خاڵه‌ به‌ته‌واوی له‌ژێر ده‌سه‌ڵاتی توركیادایه‌، ئه‌مه‌ش وای له‌ (سلیمان سه‌ویلو)ی وه‌زیری ناوخۆی توركیا كرد كه‌ به‌ر له‌ مانگێك بڵێت: ”هیچ باڵنده‌یه‌ك له‌و ناوچه‌یه‌دا نافڕێت به‌ مۆڵه‌تی ئێمه‌ نه‌بێت".

له‌به‌رئه‌وه‌ كوژرانی (به‌غدادی) شۆك بوو بۆ ئه‌ردۆگان و وه‌زیری ناوخۆكه‌ی كه‌ وتبووی: ”هیچ باڵنده‌یه‌ك نافڕێت به‌ مۆڵه‌تی ئێمه‌ نه‌بێت". ئه‌م پرۆسه‌یه‌ش بۆ هه‌موو جیهانی سه‌لماند كه‌ سه‌ركرده‌ی ڕێكخراوی تیرۆریستی داعش له‌لایه‌ن هێزه‌كانی سه‌ر به‌ ئه‌ردۆگانه‌وه‌ پارێزراو بووه‌.

ئه‌مه‌ش یه‌كێكه‌ له‌ گه‌وره‌ترین ئابڕوچوونه‌كان له‌ مێژووی توركیاو به‌ بۆچوونی منیش گه‌وره‌ترین خیانه‌ته‌ به‌رامبه‌ر وڵاته‌ باشه‌كه‌م.

خاڵێكی تر له‌م كه‌یسه‌ی كوژرانی به‌غدادیدا هه‌یه‌، ئه‌ویش پرسیارێكه‌ پێویستی به‌ هه‌ڵوه‌سته‌ له‌سه‌ر كردنێكی قووڵ هه‌یه‌: چۆن ئه‌ردۆگان ئه‌و هه‌له‌ مێژووییه‌ی له‌ده‌ستدا كه‌ بۆی ڕه‌خسێنرابوو؟ به‌شێوه‌یه‌ك ئه‌گه‌ر زانیاریی هه‌وڵگریی بخستایه‌ته‌ ڕوو سه‌باره‌ت به‌ شوێنی به‌غدادی، له‌ هه‌موو تۆمه‌ته‌كان ڕزگاری ده‌بوو، ده‌بووه‌ پاڵه‌وانێك كه‌ له‌گه‌ڵ تیرۆردا ده‌جه‌نگێت؟!

بۆچی ئه‌وه‌ی نه‌كرد؟ له‌گه‌ڵ ئه‌وه‌ی گریمان ئه‌گه‌ر زانیاریی هه‌واڵگریی پێشكه‌ش بكردایه‌، پارێزبه‌ندییه‌كی مه‌زنی له‌لایه‌ن ئه‌مریكا و ئه‌وروپاوه‌ به‌ده‌ست ده‌هێنا.
ئیدی هه‌موان ده‌پرسن: چۆن به‌غدادی توانی له‌ده‌ست هه‌واڵگریی توركیا ڕزگاری بێت و له‌گه‌ڵ خێزانه‌كه‌یدا له‌ نزیكی پێنج كیلۆمه‌تری سنوری توركیاوه‌ بژی، له‌و ناوچه‌یه‌ی به‌ چڕیی چه‌ندین تاوه‌ری چاودێریی توركیای لێیه‌؟ بێگومانین له‌وه‌ی باجی ئه‌و كه‌یسه‌ له‌سه‌ر توریكا گران ده‌كه‌وێت. 

به‌پێی شاره‌زاییم له‌ ئه‌ردۆگان، ئه‌و هه‌رگیز ئه‌و هه‌له‌ی له‌ده‌س نه‌ده‌دا، ئه‌گه‌ر به‌ده‌ست ئه‌و ده‌بوو ئه‌وا بێ ئه‌وه‌ی به‌ خه‌یاڵیدا بێت داعشی به‌ هه‌رزانترین نرخ ده‌فرۆشت، به‌ڵام دیاره‌ به‌ هۆكارێك كه‌ جڵه‌وه‌كه‌ی له‌ ده‌ستی خۆیدا نییه‌ ئه‌و هه‌له‌ی له‌ده‌ست خۆیدا. 

ئه‌گه‌ر بزانین ئه‌وانه‌ی میوانداریی به‌غدادییان كردووه‌ له‌و ناوچه‌ سنورییه‌ی نزیك له‌ توركیا هه‌ر ئه‌وانه‌ن كه‌ (ئیدلب)یان له‌ژێر ده‌سته‌، ئه‌وا خۆمان پێناگیرێت و ده‌پرسین: ئایا ئه‌وه‌ ئه‌و هۆكاره‌یه‌ كه‌ ئۆردۆگان موكوڕه‌ له‌سه‌ر بارودۆخی هه‌نووكه‌یی له‌ ئیدلب له‌ دژی دیمه‌شق؟

ئه‌وه‌ی سه‌یره‌ ئه‌وه‌یه‌ له‌ ڕووكه‌شدا به‌درێژایی سنوری نێوان عێراق تا ئیدلب هیچ كه‌سێك نییه‌ هاوپه‌یمانی به‌غدادی بێت، له‌به‌رئه‌وه‌ ئه‌و پرسیاره‌ی كه‌ دێته‌ پێشه‌وه‌ ئه‌وه‌یه‌: ئایا به‌غدادی و خێزانه‌كه‌ی ده‌یانتوانی به‌ ئاسووده‌یی و ئاسانی بگه‌نه‌ ئه‌و ناوچه‌یه‌ به‌بێ هاوئاهه‌نگیی له‌گه‌ڵ لایه‌نه‌كانی سه‌ر به‌ حكومه‌ته‌كه‌ی ئه‌ردۆگان؟ ئه‌ی بۆچی به‌غدادی ده‌یویست له‌گه‌ڵ خێزانه‌كه‌ی بێته‌ توركیا؟

له‌و بڕوایه‌دام له‌دوای ئه‌و پرۆسه‌یه‌وه‌ ژماره‌ی ئه‌و پرسیاره‌ قورسانه‌ زۆرتربووه‌ كه‌ ئاراسته‌ی ئه‌ردۆگان ده‌كرێت و پانتایی ئه‌و جموجوڵه‌ی ئه‌ردۆگان و ئه‌و لایه‌نانه‌ به‌رته‌سك بووه‌ته‌وه‌ كه‌ سه‌رپه‌رشتییان ده‌كات و ده‌یانپارێزێت. ئیدی ڕایگشتیی نێوده‌وڵه‌تیی به‌شێوه‌یه‌ك سه‌یری "ناوچه‌ی ئارام” ده‌كات كه‌ ئه‌ردۆگان پێداگره‌ له‌سه‌ر دروستكردنی، كه‌ ”ناوچه‌ی ئارام بێت بۆ تیرۆریستان” كه‌ تێیدا جرت و فرت بكه‌ن و به‌وپه‌ڕی ئاسانی و به‌ ئیسراحه‌ت خوێنڕێژیی و تاوانكاریی تێدا بكه‌ن.
سروشتی دۆخه‌كه‌ش وا ده‌بێت كه‌ ئه‌ردۆگان و حیزبه‌كه‌ی به‌ به‌رپرسیار دابنرێن له‌ هه‌مو ئه‌و تاوانانه‌ی له‌و ناوچانه‌دا سه‌ر هه‌ڵده‌ده‌ن.

هیوادارم خوێنه‌ری ئازیز هه‌ردوو وێنه‌كه‌ لێكبدات كه‌ هه‌وڵمدا له‌ پێشه‌كیی وتاره‌كه‌دا دروستی بكه‌م كه‌ چۆن له‌ ئێواره‌ی شانۆگه‌ریی (كۆده‌تا)كه‌ی ساڵی (2016)دا چه‌ته‌كان به‌ چه‌كه‌ قورسه‌كانیانه‌وه‌ دابه‌زینه‌ ناو شه‌قامه‌كان بۆ ئه‌وه‌ی ئه‌ندامان و ڕۆڵه‌كانی سوپای توركیا سه‌رببڕن، ئه‌وانه‌ له‌ كوێوه‌ هاتن؟

به‌ڵێ، دیاره‌ ئه‌وانه‌ هێزگه‌لێكن كه‌ له‌ژێر فه‌رمانی لایه‌نێكی هه‌واڵگریدان كه‌ سه‌ربه‌خۆیه‌ و سه‌ر به‌ لایه‌نه‌ ئه‌منییه‌ ڕه‌سمییه‌كان نییه‌، نه‌ك هه‌ر ئه‌وه‌نده‌، به‌ڵكو ڕاسته‌خۆ په‌یوه‌ستن به‌ ئه‌ردۆگانه‌وه‌، به‌ڵام ئه‌مانه‌ دواجار وڵاته‌كه‌م په‌لكێش ده‌كه‌نه‌ ناو سه‌ركێشیی و هه‌ڵدێرێكه‌وه‌ كه‌ كۆتاییه‌كه‌ی باش نابێت.

ئومێدی زۆرم هه‌یه‌ كه‌ كۆمه‌ڵگه‌ی نێوده‌وڵه‌تیی و دامه‌زراوه‌ نێوده‌وڵه‌تیه‌ ڕه‌سمییه‌كان له‌م جۆره‌ دۆخانه‌دا لۆمه‌ی هه‌موو توركیا نه‌كه‌ن، چونكه‌ هه‌موان ده‌زانین كه‌ به‌رپرسیاری یه‌كه‌م له‌م مه‌سه‌له‌یه‌ ئۆردۆگان و حیزبه‌كه‌یه‌تی كه‌ ئه‌م ڕه‌فتاره‌ شێتانانه‌ ده‌نوێنن، سه‌ره‌ڕای ئه‌وه‌ی ڕۆڵه‌ خاوه‌ن ئه‌قڵه‌كانی نیشتمان له‌ دژی ئه‌و كارانه‌ن، به‌ڕاستیش سه‌رنج ده‌ده‌ین كه‌ جه‌ماوه‌ر هه‌ستی به‌وه‌ كردووه‌ هه‌رچه‌نده‌ ئه‌و هه‌ستكردنه‌ زۆر هێواشه‌.

یه‌كێك له‌ پاشهاته‌كانی ئه‌و سیاسه‌ته‌ مناڵانه‌یه‌، ده‌بینین دوای چه‌ندین ساڵی دورودرێژ (ئه‌نجومه‌نی نوێنه‌رانی ئه‌مریكا) پرۆژه‌ یاسایه‌كی په‌سه‌ند كرد كه‌ ده‌وڵه‌تی توركیا تاوانبارده‌كات به‌وه‌ی له‌ ساڵی 1915 دا ئه‌رمه‌نه‌كانی جینۆساید كردووه‌، هه‌روه‌ها ئه‌و ئه‌نجومه‌نه‌ ده‌نگی له‌سه‌ر پرۆژه‌ بریارێكی تر داوه‌ كه‌ باس له‌ سه‌پاندنی سزا ده‌كات به‌سه‌ر توركیادا له‌پای ئه‌و ئۆپه‌راسیۆنه‌ سه‌ربازییه‌ی له‌ باكوری خۆرهه‌ڵاتی سوریا ئه‌نجامیدا، ئه‌و پرۆژه‌یه‌ ده‌نگی (403) ئه‌ندامی له‌ به‌رامبه‌ر(16)ده‌نگی دژدا به‌ده‌ستهێناوه‌.

سه‌رنجڕاكێشترین مادده‌ی ئه‌و زنجیره‌ سزایانه‌ كه‌ ئه‌نجومه‌نی نوێنه‌رانی ئه‌مریكا گه‌ڵاله‌ی كردووه‌، ئه‌نجومه‌نه‌كه‌ داوای كردووه‌ حسابێكی جیابكرێت بۆ سه‌رچاوه‌ی دارایی ئه‌ردۆگان و سامانی خێزانه‌كه‌ی، ناونیشانه‌ لاوه‌كییه‌كانی ئه‌و پرۆژه‌یه‌ باس له‌ داهاتی نه‌وتی داعش و سوودمه‌ندبوونی تاكه‌ كه‌سیانه‌ ده‌كه‌ن له‌و سپیكردنه‌وه‌ی پاره‌یه‌ی كه‌ ئێران له‌ توركیا كردوویه‌تی.

ڕه‌نگه‌ له‌ داهاتوودا ئه‌ردۆگان كونه‌ مشكی لێ ببێته‌ قه‌یسه‌ری! 

و/ تابلۆ عوسمان
سه‌رچاوه‌/ Independentarabia


ئه‌م بابه‌ته 473 جار خوێنراوه‌ته‌وه‌‌

بابەتەکانی تری نوسەر