هۆكاری كه‌مكردنی ده‌نگی لایه‌نه‌ ئیسلامییه‌كانی كوردستان

کۆمەڵە هۆکارێکى دەرەکى و ناوخۆیی بونەتە هۆى کەمکردنەوەى دەنگى لایەنە ئیسلامییە سیاسییەکانى هەرێمى کوردستان
PM:10:59:28/04/2019
دۆسیە: شیکار
کامڵ نەبوونى دیموکراسییەت لە کوردستان هۆکارێکى سەرەکى داکشانى دەنگى ئیسلامییەکانە لە هەرێمى کوردستان

جەلال ئەحمەد
ڕۆژنامەنووس

له‌ڕاستیدا زیاتر له‌ هۆكارێك له‌پشتی ئه‌م حاڵه‌ته‌وه‌یه‌، ده‌كرێت به‌سه‌رچه‌ند ته‌وه‌ره‌یه‌كدا پۆڵێن بكرێت.

١- هۆكاره‌ ده‌ره‌كییه‌كان(بابه‌تییه‌كان)

- نادیموكراسیبوونی حیزب و لایه‌نه‌ ده‌سه‌ڵاتداره‌كانی كوردستان و قۆرخكردنی ده‌سه‌ڵات و ده‌ستگرتنیان به‌سه‌ر سه‌رچاوه‌كانی هێز و داراییدا


له‌ڕاستیدا حیزبه‌ ده‌سه‌ڵاتداره‌كانی كوردستان به‌جۆرێك ده‌ستیان گرتووه‌ به‌سه‌ر جومگه‌كانی ده‌سه‌ڵات كه‌ به‌هیچ جۆرێك بیر له‌ ئاڵوگۆڕی ده‌سه‌ڵات و ڕاده‌ستكردنی ناكه‌نه‌وه‌ به‌ هیچ لایه‌نێكیتر، جائه‌و لایه‌نه‌ هه‌رچییه‌ك بێت و هه‌ر بیرو به‌رنامه‌یه‌كی هه‌بێت، ئیسلامی بێت یان عه‌لمانی، ئه‌مه‌ش شاراوه‌ نییه‌ و به‌كرده‌وه‌و به‌ گوتاریش گوزارشتی لێده‌كه‌ن و به‌ڕاشكاوی و پێچه‌وانه‌ی به‌رنامه‌ و دروشمه‌كانی خۆیان، باس له‌وه‌ ده‌كه‌ن كه‌ ئه‌گه‌ربایی یه‌ك كورسیش ده‌نگی جه‌ماوه‌ریان له‌گه‌ڵدابێت هه‌ر ده‌ستبه‌رداری ده‌سه‌ڵات نابن، بۆ ئه‌و مه‌به‌سته‌ش هه‌موو سه‌رچاوه‌كانی هێز و دارایییان بۆ خۆیان قۆرخكردووه‌و بۆ پارێزگاری و هێشتنه‌وه‌ی ئه‌و ده‌سه‌ڵاته‌  به‌كاری دێنن.

 

- ده‌ستێوه‌ردانی ده‌ره‌كی(هه‌رێمایه‌تی و نێو ده‌وڵه‌تی)


به‌حوكمی پێگه‌ی ئابووری و سیاسی وجوگرافی كوردستان، یاریزانه‌ سه‌ره‌كییه‌كانی گه‌مه‌ی سیاسی و داڕێژه‌ره‌ ڕاسته‌قینه‌كانی نه‌خشه‌ی سیاسی ناوچه‌كه‌ هه‌میشه‌ ڕێگرن له‌ به‌رده‌م گرتنه‌ده‌ستی ده‌سه‌ڵات له‌لایه‌ن هه‌ر هێزێك كه‌ جێگه‌ی متمانه‌ی خۆیان نه‌بێت و ئاماده‌ی شه‌ڕی به‌وه‌كاله‌ت نه‌بێت له‌به‌رژه‌وه‌ندی زلهێزه‌كان، كه‌ئه‌مه‌ش له‌سیاسه‌تی ئیسلامییه‌كاندا نه‌بووه‌، له‌كاتێكدا بۆئه‌وانیتر ڕێگه‌پێدراو و ئاسایی بووه‌، ئه‌مه‌ش وایكردووه‌ ده‌ستێوه‌ردان و هاوكاری و دژایه‌تیكردنه‌كانیان هه‌میشه‌ له‌ زیانی ئیسلامییه‌كان و بۆ به‌رژه‌وه‌ندی ئه‌وانیتربووه‌.

 

- لاوازی هۆشیاری سیاسی جه‌ماوه‌ری كوردستان له‌ ئه‌نجامی گوتاری سیاسی هه‌ڵه‌ی ئیسلامییه‌كان و چه‌واشه‌كاری ده‌سه‌ڵاته‌وه‌


پلان و پیلانه‌كانی سیاسه‌ت به‌ڕاده‌یه‌ك لێزانانه‌ هه‌ڵچنراوه‌ كه‌ هاوڵاتی ساده‌ له‌خشته‌ ده‌بات و ده‌رئه‌نجامی هه‌ڵه‌ی لێوه‌رده‌گرێت و بڕیاری هه‌ڵه‌ی پێده‌دات، ئه‌مه‌ش به‌هۆی چه‌واشه‌كاری ده‌سه‌ڵاتداران له‌لایه‌ك و گوتاری هه‌ڵه‌ی ئیسلامییه‌كانیش له‌لایه‌كی تره‌وه‌‌، هه‌ندێك له‌ ڕه‌وته‌ ئیسلامییه‌كان به‌جۆرێك بانگه‌شه‌ده‌كه‌ن و وێنای ئیسلام و ژیان له‌سایه‌ی ده‌سه‌ڵاتی ئیسلامیدا ده‌كه‌ن و ئازادییه‌كان به‌رته‌سك ده‌كه‌نه‌وه‌ كه‌ خه‌ڵكانی ده‌ره‌وه‌ی بازنه‌ ئیسلامییه‌كه‌ جێگه‌ی خۆیانی تێدا نابیننه‌وه‌، بۆیه‌ نه‌ك هه‌ر پێی خۆشحاڵ نین به‌ڵكو هه‌وڵی ڕێلێگرتنیشی ده‌ده‌ن.


ده‌سه‌ڵاتیش ئه‌م بابه‌ته‌ ته‌وزیف ده‌كات بۆ په‌شیمانكردنه‌وه‌ی ده‌نگده‌ران و كه‌مكردنه‌وه‌ی ده‌نگی ئیسلامییه‌كان.

 

- ساخته‌كاری له‌ هه‌ڵبژاردنه‌كان


ئه‌وه‌ی كه ‌له‌م هه‌رێمه‌دا زۆرترین سوكایه‌تی پێكرابێت وهیچ به‌هایه‌كی بۆ نه‌هێڵرابێته‌وه‌، هه‌ڵبژاردن و ده‌نگدان و گه‌مه‌ی دیموكراسییه‌، ساخته‌كردن سنووری ئاسایی تێپه‌ڕاندووه‌ و سیستمی ئه‌لیكترۆنی كرایه‌ گاڵته‌جاڕ، ئه‌نجامه‌كان پێشوه‌خت زانراون و له‌به‌رژه‌وه‌ندی ده‌سه‌ڵاتداران مسۆگه‌ركراوه‌، بۆیه‌ هه‌رگیز ئه‌نجامی ئه‌مجۆره‌ له‌ هه‌ڵبژاردن پێوه‌ر نین بۆ ڕێژه‌ی ڕاسته‌قینه‌ی ده‌نگی هیچكام له‌ ڕكابه‌ره‌كان.

 

- ئه‌زموونه‌ بێئاكامه‌كانی به‌شداریكردن له‌ حكومه‌ت

له‌كوردستان چه‌ند خولێكی هه‌ڵبژاردن ئه‌نجامدراوه‌ و له‌سه‌ربنه‌مای ئه‌نجامه‌كانیشی چه‌ندین حكومه‌ت پێكهێنراوه‌، به‌ڵام ئه‌وه‌ی كه‌ ڕاستییه‌كی تاڵ و حاشاهه‌ڵنه‌گره‌ ئه‌وه‌یه‌ كه‌ كاریگه‌ری و جێگه‌ ده‌ستی به‌شداربووان له‌ حكومه‌تدا ڕاسته‌وانه‌ بووه‌ له‌گه‌ڵ هه‌ژموون و ده‌سه‌ڵاتی حیزبه‌ به‌شداربووه‌كان، تا ئه‌و ڕاده‌یه‌ی كه‌ هه‌ندێك ڕۆڵی حیزبه‌ بچووكه‌كان به‌ كارتۆنی وه‌سفده‌كه‌ن، چونكه‌ ڕۆڵی ڕاسته‌قینه‌یان نه‌بووه‌ له‌ بڕیاردان و ئاڕاسته‌كردنی حكومه‌ت، نمونه‌ی دیاری ئه‌و حاڵه‌ته‌ش ناردنه‌ ماڵه‌وه‌ی به‌ كۆمه‌ڵی وه‌زیری به‌شێك له‌ حیزبه‌ به‌شداربووه‌كانی ئه‌م كابینه‌یه‌ بوو به‌ بڕیارێكی حیزبی.

ئه‌م دیارده‌یه‌ قه‌ناعه‌تی لای ده‌نگده‌ر درووستكردووه‌ كه‌ له‌ ئه‌گه‌ری به‌ده‌ستهێنانی ده‌نگ و به‌شداریكردنیش له‌ حكومه‌ت، هێشتا ئومێدی چاكسازی و گۆڕانكاری به‌دیناكرێت، دیاره‌ ئه‌مه‌ش به‌مه‌به‌ست ده‌كرێت له‌لایه‌ن حیزبه‌ ده‌سه‌ڵاتداره‌كانه‌وه‌ بۆ قووڵكردنه‌وه‌ی نائومێدی لای تاكی كوردستانی.

 

- بێئومێدبوونی هاوڵاتیان له‌ چاكسازی


هاوڵاتیانی ئه‌م هه‌رێمه‌ به‌تێپه‌ڕبوونی ئه‌م ده‌یان ساڵه‌ له حوكمڕانی ده‌سه‌ڵاتدارانی هه‌رێم‌ و تاقیكردنه‌وه‌ی چه‌ندین شێواز له‌ خه‌باتی مه‌ده‌نی بۆ گۆڕانكاری و چاكسازی و بێئاكام بوونیان، گه‌یشتوونه‌ته‌ ڕاده‌یه‌ك له‌ بێئومێدی و دابه‌زینی سه‌قفی داخوازییه‌كانیان كه‌  پێدانی مووچه‌ و قیر و ئاوه‌ڕۆ بووه‌ته‌ داواكاری و دروشمی ناڕه‌زایه‌تیه‌كانیان و  گه‌شتوونه‌ته‌ ئه‌و قه‌ناعه‌ته‌ی كه‌ بڵێن (چاكی مه‌كه‌ باخراپ نه‌بێت)، دیاره‌ ئه‌م بێئومێدكردنه‌ش پلانی بۆ داڕێژراوه‌و به‌ مه‌به‌ست بووه‌، له‌ وه‌ها هه‌ل و مه‌رجێكیشدا به‌شدارینه‌كردنی هاوڵاتی ناڕازی له‌ هه‌ڵبژاردنه‌كان به‌هۆی بێهیوابوون له‌ ئه‌نجامه‌كان ده‌بێته‌ دیارده‌، هه‌روه‌ك چۆن  له‌ دوایین هه‌ڵبژاردندا به‌شدارینه‌كردن ژماره‌ی پێوانه‌یی تۆماركرد، بێگومان پشكی شێری ئه‌م بایكۆتكردنه‌ش به‌ر ده‌نگده‌ری ئیسلامییه‌كان ده‌كه‌وێت .

 

٢- هۆكاره‌ ناوخۆییه‌كان(خودییه‌كان)

- لاوازی له‌ سیاسه‌تكردن


سیاسه‌ت هونه‌ری به‌ڕێوه‌بردن و سوودوه‌رگرتنه‌ له‌ وه‌ی كه‌ له‌ ده‌ستڕه‌سدایه‌ بۆ به‌ده‌ستهێنانی ئه‌وه‌ی ده‌كرێ و له‌ توانادایه‌ به‌ده‌ست بهێنرێت، سیاسه‌ت بریتییه‌ له‌ قۆستنه‌وه‌ی هه‌له‌كان و زاڵبوون بوون به‌ سه‌ركۆسپه‌كاندا بۆ گه‌یشتن به‌ ئامانجه‌كان، كه‌واته‌ هه‌ڵه‌یه‌ ئه‌گه‌ر به‌ جۆرێك سیاسه‌ت بكرێت كه‌ ڕكابه‌ره‌كه‌ت بتوانێت هه‌رچۆن بیه‌وێت پاشه‌كشه‌ت پێبكات به‌ره‌و گۆشه‌یه‌ك و تیایدا  گه‌مارۆت بدات و قه‌تیست  بكات و له‌ نائومێدیدا له‌به‌ریه‌ك هه‌ڵتبوه‌شێنێته‌وه‌.


پێشه‌وایانی ئیسلام، ئه‌وانه‌ی جێگه‌ده‌ستیان دیاره‌ له‌ مێژووی ئیسلامییدا، زۆرجار له‌پێناوی گه‌یشتن به‌ ئامانجه‌ گه‌وره‌كان سڵیان له‌وه‌ نه‌كردووه‌ته‌وه‌ كه‌ به‌شێوه‌ی كاتی ده‌ستبه‌رداری هه‌ندێك بابه‌تی بچوكتر ببن و نه‌یان هێڵاوه‌ پرۆسه‌ی هه‌نگاونان به‌ره‌و ئامانجه‌گه‌وره‌كه‌ په‌كبخرێت، (ڕیگه‌دانی پێغه‌مبه‌ری خوا ــ دروودی خوای لێبێت ــ به‌ كوفری زاره‌كی عه‌ممار بۆڕزگاربوون له‌ مردن و ڕازیبوونی عمرــ ڕه‌زای خوای لێبێت ــ به‌ مه‌رجی قه‌بیلیه‌كی گاوربه‌ گۆڕینی ناوی جزیه‌ له‌ به‌رامبه‌ر خۆبه‌ده‌سته‌وه‌دانیان له‌شام وده‌یان و سه‌دان هه‌ڵوێستی له‌مجۆره‌ به‌ڵگه‌ی حاشاهه‌ڵنه‌گری ئه‌و ڕاستییه‌ن).


قورئانی پیرۆز كاتێك باس له‌ سزای تاوانی به‌زین و هه‌ڵهاتن  و پشتهه‌ڵكردن له‌دوژمن ده‌كات له‌ كاتی جه‌نگ و ڕووبه‌ڕووبونه‌وه‌دا، هه‌ردوو حاڵه‌تی (متحرفا لقتال) واته‌ ته‌كتیكی جه‌نگیی و (أومتحیزا إلی فئة) كشانه‌وه‌ بۆ لای هێزه‌ سه‌ره‌كییه‌كه ‌هه‌ڵاوێردنیان بۆ ده‌كات له‌و سزایه‌ و به‌ڕێگه‌پێدراویان داده‌نێت.

ئه‌وه‌ی گوزه‌راوه‌ زۆربه‌ی هه‌ره‌زۆری بزاڤ و جوڵانه‌وه‌ ئیسلامییه‌كان له‌ژێر كاریگه‌ری پلان و پیلانی نه‌یاره‌كانیان وبه‌هۆی پابه‌ندبوونی حه‌رفی و مكوڕبوونیان له‌سه‌ر هه‌ندێ بابه‌تی بچوك و په‌نا نه‌بردنیان بۆ مانۆڕی سیاسی له‌ ململانێكاندا، هه‌میشه‌ پاشه‌كشه‌یان پێكراوه‌وخزێنراونه‌ته‌ گۆشه‌ و به‌تۆمه‌تی جۆراو جۆر له‌ جه‌ماوه‌ر دابڕێنراون وسه‌ره‌نجام شكستیان پێهێنراوه‌. 

 

- گوتاری سیاسی هه‌ڵه‌


هه‌ر ده‌سته‌یه‌ك كه‌ دێته‌ گۆڕه‌پانی سیاسه‌ت وده‌ستبه‌كارده‌بێت و ناو و ناونیشانێك بۆ خۆی ده‌ستنیشانده‌كات، ڕاسته‌وخۆ خه‌ڵك و جه‌ماوه‌ر بیر له‌وه‌ ده‌كه‌نه‌وه‌ و پرسیاری ئه‌وه‌ ده‌كه‌ن، كه‌ ئایا ئه‌مان له‌كوێی ئه‌و به‌رنامه‌یه‌ی ئه‌واندان؟ ئایا سوود، یان زیانیان بۆ ئه‌م هه‌یه؟‌ (به‌كوردی، ده‌پرسن ئاخۆ زیانی هه‌یه‌ بۆ په‌زه‌كان؟!) هه‌ڵه‌ گه‌وره‌كه‌ ئه‌وه‌یه‌ كه‌ زۆرێك له‌ ڕه‌وته‌ ئیسلامییه‌كان و به‌شێوازو ڕێژه‌ی جیاواز، به‌ جۆرێك به‌رنامه‌ی ئیسلام وسایه‌ و ده‌سه‌ڵاتی ئیسلامی وێنا ده‌كه‌ن بۆ خه‌ڵك، كه‌ ته‌نها بژارده‌ ته‌سلیم بوونه‌ و مه‌ودایه‌ك بۆ ئازادی بیروڕا ناهێڵنه‌وه‌، له‌كاتێكدا ئه‌وه‌ پێچه‌وانه‌ی ده‌قی ڕاشكاوی قورئان و سیره‌ی پێغه‌مبه‌ری خوایه‌(علیه‌ الصلاة و السلام) و مێژووی ئیسلامیش به‌و شێوه‌یه‌ نه‌بووه‌.


دیاره‌ ئه‌وه‌ش هۆكارێكی گرنگه‌ بۆ هه‌موو ئه‌وانه‌ی كه‌ بیر و ئایدیایه‌كی تریان هه‌یه‌ و ئه‌وانه‌ش كه‌ موسوڵمانن به‌ڵام گوناهكارن و پابه‌ندبوونیان لاوازه‌، كه‌ بترسن له‌وه‌ی له‌ سایه‌ی ده‌سه‌ڵاتی ئیسلامییه‌كاندا ژیانیان لێ تێك بچێت و ئازادییان لێ زه‌وت یان به‌رته‌سكبكرێته‌وه‌، بۆیه‌ ده‌چنه‌ سه‌نگه‌ری دژایه‌تی و به‌رهه‌ڵستیكردن و خه‌ڵكیش په‌شیمان ده‌كه‌نه‌وه‌، یان لانیكه‌م هاوكار نابن.

 

- تێكه‌ڵكردنی بانگه‌وازو سیاسه‌ت(سه‌ركه‌وتن له‌ بانگه‌وازو شكست له‌ سیاسه‌تدا)


ئاشكرایه‌ و زۆرێك له‌ نه‌یارانیش گه‌واهیده‌ری ئه‌و ڕاستییه‌ن كه‌ ئیسلامییه‌كان له‌ بواری په‌روه‌رده‌و پێگه‌یاندنی تاكی ڕه‌وشت به‌رزو سوودبه‌خش به‌ كۆمه‌ڵگه‌ سه‌رمه‌شق و پێشه‌نگ بوون و به‌شێكی زۆر له‌ سه‌قامگیری ئاسایشی كۆمه‌ڵایه‌تیی كۆمه‌ڵگه‌ی كورده‌واری له‌وێوه‌ سه‌رچاوه‌ی گرتووه‌.


به‌ڵام سیاسه‌تكردن به‌ هه‌مان ڕیتم و هه‌مان كاره‌كته‌ر و هه‌مان میكانیزم به‌رئه‌نجامی نه‌خوازراوی لێكه‌وتووه‌ته‌وه‌ و ئیسلامییه‌كان له‌بواری سیاسیدا نه‌یانتوانیوه‌ پێشكه‌وتن و سه‌ركه‌وتن به‌ده‌ستبێنن، هه‌ربۆیه‌ بابه‌تی جیاكردنه‌وه‌ی بانگه‌واز له‌ سیاسه‌ت بووه‌ته‌ جێگه‌ی  قسه‌ له‌سه‌ر كردن و مشتومڕی نێو بیرمه‌ندان و بانگخوازانی ناو ڕه‌وته‌ ئیسلامییه‌كان، بۆ ئه‌م مه‌به‌سته‌ش  دابه‌شكردنی ڕۆڵ و ته‌واوكاری له‌ نێوان بانگه‌واز و‌سیاسه‌ت وه‌ك باشترین بژارده‌‌ بۆ په‌یوه‌ندی نێوان بانگه‌واز و سیاسه‌ت پێشنیار ده‌كرێت.


- په‌رته‌وازه‌یی و ناته‌بایی ئیسلامیه‌كان له‌ نێو خۆیاندا


ناته‌بایی و په‌رته‌وازه‌یی هۆكاری گه‌وره‌ی شكست و لاوازییه‌، ئه‌مه‌ بۆ ئیسلامییه‌كانیش هه‌روایه‌و بگره‌ كاریگه‌رتریشه‌، له‌ كاتێكدا ئیسلامییه‌كان بۆ بردنه‌وه‌ له‌ سیاسه‌تدا زۆرترین له‌مپه‌ریان له‌به‌رده‌مدایه‌، له‌وانیتر زیاتر پێویستییان به‌ خاڵی هێز و خۆلادانه‌ له‌ هۆكاری لاوازی، بۆیه‌ په‌رته‌وازه‌یی و كۆنه‌بوونه‌وه‌یان بووه‌ته‌ هۆكاری بێئومێدی ده‌نگده‌ران.


- وازهێنانی به‌شێك له‌ ئه‌ندامانی حیزبه‌ ئیسلامییه‌كان

هه‌ریه‌ك له‌ و هۆكاره ناوخۆییانه‌ی سه‌ره‌وه‌، بوونه‌ته‌ هۆی گله‌یی به‌شێك له‌ كادێرانی خودی ئه‌و حیزبانه‌ و ڕه‌خنه‌یان گرتووه‌ و پێشنیاری گۆڕانكاری وچاكسازی ناوخۆییان كردووه‌ بۆ خۆلادان له‌و كه‌م و كورتییانه‌، به‌ڵام به‌ داخه‌وه‌ هه‌ندێك له‌و هه‌وڵانه‌ ڕووبه‌ڕووی شكست بوونه‌ته‌وه‌، به‌هۆی مكووڕبوونی به‌شێك له‌ بڕیاربه‌ده‌ستانی ئه‌وحیزبانه‌ له‌سه‌ر ئه‌و نه‌زمه‌ له‌كاركردن و ڕێگرییان له‌و هه‌وڵی گۆڕانكاری و چاكسازییه‌ ناوخۆییانه‌، یان سستی له‌ وه‌ڵامدانه‌وه‌ی ئه‌و داواكارییانه‌، سه‌ره‌نجام بێئومێد بوون وازهێنان ودووركه‌وتنه‌وه‌ و له‌ده‌ستدانی ئه‌و كادێره‌ ڕه‌خنه‌گرانه‌ی لێكه‌وتووه‌ته‌وه‌، ئه‌مه‌ش ئه‌گه‌ر كۆی ئه‌و حاڵه‌تانه‌ و له‌ سه‌رجه‌م قۆناغه‌كاندا و بۆ هه‌موو حیزبه‌كان وه‌ربگریت، ڕێژه‌یه‌كی به‌رچاو ده‌كات كه‌ كاریگه‌ری نه‌رێنی خۆی هه‌یه‌ له‌سه‌ر كه‌مكردنی لایه‌نگران و دابه‌زینی ده‌نگ، به‌تایبه‌ت ڕێژه‌یه‌ك له‌وانه‌ سه‌ركرده‌ و كادێری پێشكه‌وتوو ‌بوون و خاوه‌ن پێگه‌ی حیزبی و جه‌ماوه‌ریی بوون.


ئه‌مانه‌ گرنگترینی ئه‌و هۆكارانه‌ن كه‌ به‌ بۆچوونی من هۆكاربوون بۆپاشه‌كشه‌ و كه‌مكردنی ده‌نگی حیزبه‌ ئیسلامییه‌كانی كوردستان، ده‌كرێت هۆكاری تریش هه‌بن، هه‌موو ئه‌وانه‌ش شیكردنه‌وه‌و لێكدانه‌وه‌ن و ده‌كرێت ڕاجیایی له‌سه‌ر هه‌بێت، به‌هیوای هه‌رچی زووتری گۆڕانكاری ئه‌رێنی و به‌ره‌و پێشچوون، بۆ گه‌یشتن به‌ حوكمڕانیه‌كی باش و دادپه‌روه‌ر و كۆمه‌ڵكه‌یه‌كی ئاسووده‌ وخۆشگوزه‌ران و تاكێكی به‌خته‌وه‌ر.‌


ئەم وتارە بەشێکە لە زنجیرە وتارەکانى دۆسیەى " ئەزمونى بزافی ئیسلامیی سیاسی لە کوردستان (مێژوو، ئێستا، ئایندە)" بۆ بینینى تەواوى وتارەکانى ئەو دۆسیەیە کرتە لێرە بکە



ئه‌م بابه‌ته 120 جار خوێنراوه‌ته‌وه‌‌

بابەتەکانی تری نوسەر