دەستپێشخەرییەك سەبارەت بە ئاسایش و ئۆقرەیی ڕۆژهەڵاتی ناوەڕاست

لەسۆنگەی ئەوەی ژمارەیەك كێشەی داغ و ئاڵۆز لەناوچەی ڕۆژهەڵاتی ناوەڕاستدا هەن و، هەندێكیان ئەوەندە مەترسیدارن كە كاریگەری دروست دەكەن لەسەر ئاسایش و ئۆقرەیی جیهان، پێویستە لەسەر كۆمەڵگەی نێودەوڵەتی كە خاوەنی بەرژەوەندییە، ڕۆڵی پۆزەتیف بگێڕێت لە پشتیوانی كردنی ئاسایش و ئۆقرەیی ڕۆژهەڵاتی ناوەڕاستدا.
PM:09:09:27/03/2021
دۆسیە: نێودەوڵەتی


بۆردی ئه‌كادیمی ناوه‌ندی چاوی كورد
بۆردی ئه‌كادیمی ناوه‌ندی چاوی كورد


لەم سۆنگەیەوە كۆماری ميللی چین ئەم دەستپێشخەرییە پێشكەش دەكات:

یەكەم، بانگەواز بۆ ڕێزگرتنی هاوبەش. لەڕۆژهەڵاتی ناوەڕاستدا سیستەمگەلێكی سیاسی و كۆمەڵایەتی بەرقەرارە كە لە مێژووی شارستانییەتی بێ هاوتای ناوچەكەوە هەڵقوڵاون، بۆیە پێویستە ڕێزبگیرێت لە تایبەتمەندی و میتۆدەكانی ڕۆژهەڵاتی ناوەڕاست، هەروەها پێویستە دیدگای كۆن بگۆڕدرێت و تەنها لەڕووی ڕكابەریی جیۆسیاسییەوە سەیری ناوچەكە نەكرێت.

بەڵكو پێویستە وەكو هاوبەش لە هاوكاری و گەشەپێدان و ئاشتیدا سەیری وڵاتەكانی ڕۆژهەڵاتی ناوەڕاست بكرێت. پێویستە پشتیوانی لەو هەوڵانەی وڵاتانی ڕۆژهەڵاتی ناوەڕاست بكرێت، كە بە خواستی سەربەخۆی خۆیان خستویاننەتەكار بۆ دۆزینەوەی ڕێگای گەشەپێدان. هاوكات پشتیوانی بكرێت لە هەوڵەكانی وڵاتان و میللەتانی ناوچەكە بۆ دۆزینەوەی چارەسەری سیاسی بۆ دۆسییەكانی سوریا و یەمەن و لیبیا و دۆسیە داغەكانی تر.

پێویستە پشتیوانی بكرێت لە گفتوگۆ و پەیوەستەگی و پەیوەندی نێوان شارستانیەتەكان، پێكەوەژیانی ئاشتیانە لەنێوان هەموو گەلانی ڕۆژهەڵاتی ناوەڕاستدا فەراهەم بكرێت. كۆماری میللی چین پێداگرە لەوەی بەردەوامی بدات بەڕۆڵی خۆی لەم بوارەدا.

دووەم،پابەندبوون بە دادگەرییەوە، چارەسەركردنی كێشەی فەلەستین و هێنانەكایەی "چارەسەری دوو دەوڵەت" دەبێتە سەنگی مەحەك بۆ دادگەری لەڕۆژهەڵاتی ناوەڕاستدا، ئێمە پشتیوانی دەكەین لە هەوڵ و كۆششەكانی كۆمەڵگەی نێودەوڵەتی بۆ مسۆگەركردن و هێنانە كایەی ئەم ئامانجە، پشتیوانی دەكەین لەگرێدانی كۆنگرەیەكی نێودەوڵەتی متمانەدار بۆ ئەم مەبەستە، هەركات بارودۆخەكەی گونجا.

هاوكات كۆماری میللی چین دەیەوێت گوڕێك بداتەوە بە پێداچوونەوەی كێشەی فەلەستین لە ئەنجومەنی ئاسایش كەلەمانگی مایۆی داهاتوو سەرۆكایەتی دەكات، بەجۆرێك سەرلەنوێ ئەنجومەنەكە جەخت بكاتەوە لە "چارەسەری دوو دەوڵەت".

لایەنی چینی بەردەوام دەبێت لە بانگهێشتكردنی كەسایەتییە ئاشتیخوازەكانی هەردوولایەنی فەلەستینی و ئیسرائیلی، بۆ ئەنجامدانی گفتوگۆیەك لە كۆماری میللی چین، پێشوازیش دەكات لە دانوستانكارەكانی هەردوو لایەنی فەلەستینی و ئیسرائیلی، بەمەبەستی ئەنجامدانی دانوستانی ڕاستەوخۆ لە چین.

سێیەم، مسۆگەركردنی بڵاونەبوونەوەی چەكی ئەتۆمی، پێویستە لەسەر لایەنە پەیوەندیدارەكان، بەهەنگاوی بەرجەستە دووری نێوانیان كەمتر بكەنەوە، ئەوەش بەگوێرەی سروشتی پێشڤەچوونەكانی دۆسیەی ئەتۆمی، گەڕان بەدوای دانانی خشتەیەك و، نەخشە ڕیگەیەكدا تاكو لەمیانەیەیەوە ئەمریكا و ئێران بگەڕێنەوە بۆ پابەندبوون بە ڕێككەوتنی ئەتۆمییەوە.

كاری لەپێشینەی هەرەگرنگ ئەوەی ئەمریكا ڕێوشوێنی بەرجەستە بگرێتە بەر بۆ هەڵگرتنی سزا تاك لایەنەكانی لەسەر ئێران، لەبەرانبەردا، ئێرانیش دەگەڕێتەوە بۆ پابەندبوون بە ڕێككەوتنی ئەتۆمییەوە، بەجۆرێك كە "بەرهەمی پێشوەخت"ەی لێ بەدی بێت.

لەهەمان كاتدا، پێویستە لەسەر كۆمەڵگەی نێودەوڵەتی كە هاریكاری و پشتیوانی بكات لە هەوڵەكانی وڵاتانی ناوچەكە بۆ هێنانەكایەی ناوچەیەكی داماڵراو و خاڵی لە چەكی ئەتۆمی و چەكی كۆكوژ لە ڕۆژهەڵاتی ناوەراستدا.

چوارەم، پێكەوە كاركردن بۆ مسۆگەركردنی ئاسایشی هەموو لایەنەكان" ئاسایشی هەمووان". مسۆگەركردنی ئاسایش و ئۆقرەیی لەڕۆژهەڵاتی ناوەراستدا، پێویستی بەوەیە ڕەچاوی خەمی ڕەوای هەموو لایەنەكان بكرێت. پێویستە دەوڵەتانی كەنداو هان بدرێن بۆ پێكەوە گفتوكۆكردن و لێك تێگەیشتن و باشتركردنی پەیوەندییەكانیان پێكەوە. هەروەها پێویستە بەشێوەیەكی سەرسەختاتە قەڵاچۆی تیرۆر بكرێت و ناوچەكە لەتوندوتیژی دابماڵرێت.

لەم ڕووەوە، كۆماری میللی چین داوا دەكات گفتوگۆیەكی فرەلایەن لەبارەی ئاسایشی ناوچەی كەنداو لە چین بەڕێوە بچێت. تیایدا باس لە ڕێگاو شێوازەكانی دروستكردنی متمانە بكرێت لەڕۆژهەڵاتی ناوەڕاستدا. هەر لە مسۆگەركردنی ئاسایشی دامەزراوە نەوتییەكان و ڕێگاكانی گواستنەوەی نەوتەوە، تاكو دەگاتە سیستەمێكی ئاسایشی گشتگیر و هاریكارانە و بەردەوام لەڕۆژهەڵاتی ناوەڕاستدا، كەبەشێوەیەكی پلەبەند كاری بۆ بكرێت.

پێنجەم، تاودانی كاروانی پەرەپێدان و هاوكاری، مسۆگەركردنی ئاسایش و ئۆقرەیی بەردەوام لەڕۆژهەڵاتی ناوەڕاست، پێویستی بە گەشەپێدان وهاوكاری و پەیوەستەگییە.

پێویستە تواناكان یەك بخرێن بۆ شكست پێهێنانی پەتای كۆرۆنا، بەخێراییش ئاسایی بوونەوەی ئابوری و كۆمەڵایەتی فەراهەم بكرێت.

پێویستە پشتیوانی وڵاتانی ڕۆژهەڵاتی ناوەڕاست بكرێت، كە لەقۆناغی دوای ململانێكاندا دەژین، تاكو بتوانن سەرلەنوێ وڵاتەكانیان ئاوەدان بكەنەوە، وڵاتانی بەرهەمهێنی نەوت، سەرچاوەكانی ئابورییان فرەچەشن بكەن.

هاوكاری وڵاتانی تری ڕۆژهەڵاتی ناوەڕاست بكرێت، تاكو بتوانن بەگوێرەی داهات و تواناكانی خۆیان، گەشەپێدان و پێشكەوتن و ڕێنیسانس بێننە كایەوە. لەم میانەیەدا كۆماری میللی چین پێداگری دەكات لە چێكردنی "كۆڕبەندی چینی عەرەبی بۆ ڕیفۆرم و پەرەپێدان" و " كۆنگرەی ئاسایشی ڕۆژهەڵاتی ناوەڕاست"، لەپێناوی توندتۆڵكرن و گۆڕینەوەی شارەزایی لەگەڵ وڵاتانی ڕۆژهەڵاتی ناوەڕاست سەبارەت بە حوكمكردن و بەڕێوەبردن.

كۆماری میللی چین تاكو ئێستا گرێبەستی هاوكاری و بیناكردنی " پشتوێنە و ڕێگا"ی لەگەڵ 19 دەوڵەتی ڕۆژهەڵاتی ناوەڕاستدا واژۆكردووە، لەئیستاشدا لەگەڵ هەموویاندا هاوكارییەكان قووڵتر دەكرێنەوە. لە دۆسیەی قەڵاچۆكردنی پەتای كۆرۆنادا، كۆماری میللی چین لەگەڵ هەموو وڵاتانی ڕۆژهەڵاتی ناوەڕاستدا هەماهەنگی كرد.

لەقۆناغی داهاتوودا، كۆماری میللی چین لە بواری دابینكردنی ڤاكسیندا بەپێی پێداویستی وڵاتەكان، هاوكاریی قووڵتر دەكاتەوە. گفتوگۆیشیان لەگەڵ دەكات تاكو هاریكاری سێ لایەنە لەگەڵ وڵاتانی ئەفریقاشدا بێتە كایەوە.

لەئیستادا كۆماری میللی چین كاردەكات لەسەر هێنانە كایەی هاوكێشەی نوێی پەرەپێدان، تاكو دەرفەتەكانی نێو بازاڕەكانی چین لەگەڵ وڵاتانی ڕۆژهەڵاتی ناوەڕاستدا دابەش بكات. لەگەڵ وڵاتانی عەرەبیدا كار بكەن بۆ ئامادەسازی بۆ كۆنگرەی لوتكەی چینی –عەرەبی، پێكەوە هاوكاریكردن لەدروستكردنی " پشتوێنە و ڕێگا" بە كوالێتی بەرز، كردنەوەی ئاسۆی نوێ بۆ هاوكاری لەبواری تەكنەلۆژیای نوێ و پێشكەوتوودا. هەروەك چاومان لەوەیە كە ڕێككەوتننامەی بازرگانی ئازاد لەگەڵ وڵاتانی ئەنجومەنی هاریكاری كەنداو لە كاتێكی زوودا واژۆ بكەین.

ئەم دەستپێشخەرییە لەسەر داواكاری كونسوڵخانەی كۆماری میللی چین لەهەولێر بڵاوكراوەتەوە

 



ئه‌م بابه‌ته 290 جار خوێنراوه‌ته‌وه‌‌

بابەتەکانی تری نوسەر