بەوێنە، پانێلی فراوانی: 236 ساڵەی سلێمانی وئاسۆكانی گەشەپێدان

بۆردی ئەكادیمی ناوەندی چاوی كورد پانێلێكی فراوانی بابەتی سازكرد و بەژمارەیەك پێشنیار و سەرنج كۆتایی هات.
PM:01:32:21/11/2020
دۆسیە: پانێل
لەیادی 236 ساڵەی دامەزراندنی شاری سلێمانیدا، چی بكرێت بۆ ئەم شارە؟ كەموكووڕییەكانی چین؟ لەڕووی بابەتییەوە چۆن هەڵسەنگاندن بۆ كێشەكانی بكەین؟

بۆردی ئه‌كادیمی ناوه‌ندی چاوی كورد
بۆردی ئه‌كادیمی ناوه‌ندی چاوی كورد


بۆردی ئەكادیمی ناوەندی "چاوی كورد"  دۆسیەی "نیشتمانسازی" لە 236 هەمین ساڵیادی دامەزراندنی شاری سلێمانیدا، پانێلێكی فراوانی بەڕێوەبرد، پانێلەكە ژمارەیەك لە ئەكادیمیست و ڕۆشنبیران و پسپۆڕانی بواری شارسازی كۆكردەوە.

توانرا گفتوگۆیەكی بابەتی و هەمەلایەن و چڕ لەسەر كێشەكانی سلێمانی و، ڕێگاكانی چارەسەركردنی كێشەكان بكرێت. بەشدارانی پانێلەكە ڕاو سەرنجەكانی خۆیان لە 9 خاڵدا كۆكردەوە كەلەكۆتایی ئەم ڕاپۆرتەدا دەیخەینە بەرچاو.

پوختەی سەرنجەكانی بەشداربووان لەسەر كێشەكانی سلێمانی، بریتی بوون لەم خاڵانەی خوارەوە:

یەکەم: لەبوارى بیناسازى وتەلارو خانوو، دەبینین لە ئێستادا ئەم شارە خانووە کۆنەکانى بەرەو نەمان وڕووخان ولەناو چوون چوون. تەنانەت بەدەگمەن خانوویەکى کۆن و کوچەو کۆڵانێکى ماوە، کە مێژوو وکلتورو ڕەسەنایەتى سلێمانى پێوە دیاربێت.

ئەم شارە خۆى داهێنانى تایبەتى هەبووە لە بیناسازى وشێوازى کوچەوکۆڵان وگەڕەک. وەکو ئەوەى خانوى جوان و مێژوویى و چوخمى لەچەندین گەڕەکدا هەبووە، ئێستا هیچى نەماوە بۆنەتە گەراج وپارکى ئۆتۆمبیل.

 بۆ ئەم مەبەستە پێویستە ئەوەى ماوە پارێزگارى لێبکرێت، هەندیک بینا لەو کەلاوەو شوێنەنانەى کە کەوتونەتە گەڕەکە کۆنەکانى شار، یاخود بەکلتورى ناو دەبرێن بە شێوەى کۆنى خۆى بنیات بنرێنەوە.

ئەوە سەرەڕاى ئەوەى لە ئێستادا گرفتی شوێنى نیشتەجێوبون هەیە، رێژەیەکى بەرچاوى خەڵک و فەرمانبەرانى حکومەت کرێ چین، دەیان ساڵە زەوى و یەکەى نیشتەجێبوون نەدراوە بە فەرمانبەران، مەگەر تەنها ئەوانەى حیزبى بوون وەریانگرتووە، هەروەها ئەو پرۆژانەى لە وەبەرهێنان دەکرێت رەچاوى بژێوى و ژیانى کەمدەرامەتى موچەخۆر ناکەن.. ئەوەش وادەکات سودمەندنەبن، بەتایبەتى ئەو فەرمانبەرانەى لەتەمەنى ئەم حکومەتە دامەزراون  پێوستیان بە هاوکارى هەیە، چونکە ئەم چینە لەم بارودۆخەدا خێزانیان پێکەوە ناوەو بژێویان باش نیە.

نایەکسانى هەیە لەنێوان کارمەندى وەزارەتەکان، بۆ نمونە: مامۆستاى زانکۆو فەرمانبەرانى زانکۆ سودمەندن لە زۆر ڕوەوە، بەلام مامۆستاو فەرمانبەرانى تر وەکو ئەوان نین کە ئەمەش ناعەدالەتیە لە موچەو بەخشینى شوێنى نیشتەجێوبووندا...هەروەها هەندێک لەوخانوانەى دروستدەکرێن مەرجى تەندروستى و سەلامەتى و پاراستنى وزەى کەمە.

دووەم: کاتى خۆى ئەم شارە جێگەى کاروان سەراو بازرگانى بووە لەناوخۆى کوردستانى گەورەو دەروەشدا، وەکو ئەوەى ناوەندى مامەڵەو گواستنەوەى کەلوپەل وشمەک بووە بۆ ناوخۆو دەرەوەى شارەکە وەکو شارەکانى ترى(کرماشان، سنە، تەبرێز، مهاباد، کەرکوک، بەغدا، موسڵ، حەلب..)

ئێستاش چەندین مەرزى نێودەوڵەتى وفەرمى ونافەرمى لە دەروازە سنوریەکانیدا هەیە، بەلام  لە داهات ودەسکەوت و پشکى بۆ ناوچەکە خەرج ناکرێن، ئەمە سەرەڕى خراپى رێگەوبان و نەبوونى خزمەتگوزارى شارستانى لەو شوێنانە، وەکو ئەوەى شوێنى حەوانەى لە ئوتێل و چێشتخانەو...هتد، میوانخانەى گونجاوى تیادا نیە.جگە لەکەموکووڕى لە خزمەتگوزارى تەندروستى پێوستى بەردەوام و پێشکەوتوو.

سێیەم: لەڕووکارى گەشتوگوزارەوە،ئەم ناوچەیە بایەخى تەواوى پێنەدراوەو وەکو پێویست رێکنەخراوە، نزیکترین سەیرانگە سەرچنارە کە جاران خێزانەکانى شار وگەنجى شارەکە رۆژانە رویان تێ دەکرد لەبەر نزیکى ودڵرفێنى، بەڵام ئێستا زۆربەى خێزانەکانى ناو شار ناتوانن سەردانى بکەن.

ئەمە جگە لەوەى چەندین شوێنى گەشتووگوزارى نزیک شار هەن، وەکو پێویست خزمەتگوزارییان تیادا نیە.

چوارەم: ئەم شارە کاتى خۆى پێگەى ئابورى لەسەر کشتوکاڵ و پیشەى ناوخۆیى بووە، کارى بازرگانى  پێوەکراوە، بەرهەمەکانى خەڵکى ئەم شارە نێراوەتە دەرەوەى شارو کورستان. لەبرى ئەوەش ئەوەى پێویست بێت لە شتومەکى باش هێناویانەتە ناوشار.

بەڵام لە ئێستادا بازاڕەکانى شار پڕە لەبەرهەمى هاوردەو بیانى، بەکەمى وبەدەگمەن بەرهەمى ناوخۆى پوخت بەردەست ئەکەون. ئەوەشى کە دەهێنرێت لە کەلوپەل وشمەک زۆر باش نین و لە ئاستى گونجاودانین. ئەمەش بووەتە هۆکارى بەهەدەردانى سەروەتى ئەم شارەو، تاڵانکردنى گیرفانى هاوڵاتیان. دەتوانین بڵێین: کەرتى کشتوکاڵ وپیشەى ناوخۆیى لاوازەو لەئاستى نەماندایەو، ناتوانێت کێ بڕکێى دەرەوە بکات.

پێنجەم:  لەئێستادا کۆڵەکەیەکى ترى دارایى وسەرچاوەى وزە، بەرهەمە نەوتییەکانە کە سەرچاوەى سروشتى لەغازو نەوتى زۆرهەیە، بەڵام نە لەداهاتى وەکو ئابورى بۆ پێشخستنى شارەکە، نە لە سوتەمەنیەکەى وەکو بەکارهێنەر هاوڵاتیانى ئەم شارە سودى لێ نابینن.

داهاتى ئەم سەرچاوە سروشتیانە بەشى بوژانەوەى ئابورى وژیان وگوزەرانى خەڵکى دەکات گەر بە شەفافى وعەدالەتى مامەڵەى لەگەل بکرێت.

شەشەم: ئەم شارە هەر لەسەرەتاى دامەزراندنییەوە دەوڵەتەکانى ناوچەکە دژى بوون و پلانیان لە دژى گێڕاوە، وەکو ئەوەى لەڕێكکەوتنى "ئەرزەڕۆمى دووەم" مامەڵەى نێودەوڵەتى لە دژکراوە.

لەلایەكی تریشەوە،  دامەزراوە خزمەتگوزارییەکانى وەکو پرۆسەى پەروەردەو فێربوون، ژمارەى قوتابخانەو مامۆستا وقوتابى وەک پێوەرە پەروەردەییەکان نیە، هەروەها کەرتى تەندروستى بەرەو داڕووخان دەچێت، کەمى ئاو و کارەبا،ئەم سێكتەرەش پێوست نیە لەسەر بنەماى پیویستى ژمارەى دانیشتوانى شارەکە لە ئێستادا. کە پێویستە ئاو وکارەبا بۆ هەموو خێزانەکان بەردەست بێت لە ٢٤ کاتژمێرو رۆژانەو مانگانە.

رێگەوبانەکان وەکو پێوست نین بۆ هاتووچۆى ناو شار، کێشەى قەرەباڵغى وهاتووچۆ هەیە،کە پێویستە چارەسەر بکرێت، چونکە بەرەو خراپى زیاتر دەچێت.

حەوتەم: پێویستە گرنگى وبایەخ بدرێت بە رێژەى سەوزایى لە ناوشارو دەرەوەى شار.

هەشتەم: ئەم شارە ئازادى بەخشیووە، بەڵام ئەوەى ئێستا هەیە ئازادى نیە فەوزایە، بێ رەچاوکردنى بنەماکان دەشێوێنرێت، دەڕوخێنرێت، کلتورى لەناو دەبرێت،بەرهەم وداهاتى دەشاردرێتەوە ودەخورێت.

بەداخەوە تەنانەت رۆژى یادکردنەوەکەشى ئازار ئەدەن بێ بنەماو بێ زانیارى، تەنها بەوەى هەرکەس هات و تەنها خۆى دەناسێ و ئەوى پێشووى دەهاڕێ.

نۆیەم: ئەم شارە وەکو پایتەختى رۆشنبیرى ناوزەند دەکرێت، لەگەڵ ئەوەى خۆى پایتەختى رۆشنبیریە، بەڵام ئەوەى دەبینرێت حکومەت لەم شارەدا پلانى ڕوون و ئاشکراى نیە بۆ کایە رۆشنبیرییەکەى، دامەزراوە رۆشنبیرییەکانى چەندین کێشەو کەموکووڕییان هەیە.


گەلەری وێنەكان









ئه‌م بابه‌ته 58 جار خوێنراوه‌ته‌وه‌‌

بابەتەکانی تری نوسەر